Според Валтер Опорто, регионалниот шеф на здравството во Арекипа, 36 лица загинале на местото на настанот, а уште едно лице починало во болница. Опорто се повика на информации од пожарникари кои биле на местото на настанот
Најмалку 37 лица загинаа, а десетици се повредени во Перу откако автобус, по судир со пикап, се урна во провалија длабока околу 200 метри.
Несреќата се случила во раните утрински часови на тешка делница од Панамериканскиот автопат, кој ги поврзува Перу и Чиле, во јужниот регион Арекипа, јавува Би-би-си.
Според локалните медиуми, во автобусот имало 60 патници. Возилото се судрило со пикап на кривина, потоа скршнало од патот и паднало до брегот на реката Окоња.
Автобуските несреќи се чести во Перу, особено ноќе и по планински патишта. Причините често се лоши услови на патиштата, прекумерна брзина и недостиг на сигнализација.
❗️⚠️🇵🇪 – Bus Crash in Southern Peru Kills 37
— 🔥🗞The Informant (@theinformant_x) November 12, 2025
At least 37 people died and 13 others were injured early on November 12, 2025, when an interprovincial passenger bus collided with a pickup truck on a sharp curve and plunged more than 200 meters (650 feet) into a ravine along the… pic.twitter.com/mPzpj9M6Cs
Автобусот, управуван од компанијата „Љамосас“, патувал од градот Чале, во покраината Каравели, до Арекипа. Двајцата возачи наводно ја преживеале несреќата.
Фотографиите од местото на настанот го покажуваат автобусот целосно уништен на дното од стрмна провалија, со скршени прозорци, смачкано тело и урнат покрив.
Валдор Љерена, градоначалник на округот Окоња, во изјава за радиото РПП рече дека теренот во областа е многу тежок и дека областа има долга историја на смртоносни несреќи.
Полицијата соопшти дека нивните експерти ќе ја утврдат причината за несреќата. Според Валтер Опорто, регионалниот шеф на здравството во Арекипа, 36 лица загинале на местото на настанот, а уште едно лице починало во болница. Опорто се повика на информации од пожарникари кои биле на местото на настанот.
Здравствените власти за РПП изјавија дека 25 лица, меѓу кои и три малолетни, се лекуваат во локална болница. Истрагата е во тек, а возачот на пикапот е уапсен, соопшти Канцеларијата на државниот обвинител.
Според официјалните бројки, повеќе од 3 300 луѓе загинале во сообраќајни несреќи во Перу во 2022 година, а безбедноста на патиштата е голем проблем. Панамериканскиот автопат, долг 48 000 километри, од Алјаска до јужна Аргентина, го држи рекордот за најдолг пат во светот што може да се вози со автомобил.