Порано денеска премиерот Димитар Ковачевски го презентираше пакетот мерки утврден на владина седница, а кој опфаќа 26 точки
ВМРО-ДПМНЕ излезе со реакција на предлогот на премиерот Ковачевски за намалување на цените на горивата и ДДВ, истакнувајќи дека тоа е „комплициран модел кој граѓаните не го разбрале“.
Професорот Трајко Славески од редовите на опозициската партија истакна дека власта требало да го прифати предлогот за намалување на акцизата, наместо да предлага „комплициран модел“.
„Наместо да го прифати предлогот за намалување на акцизата кај нафтените деривати, како што предлага ВМРО-ДПМНЕ, со што цената на бензинот од утре би се намалила за 13 денари, а на дизелот за девет денари, премиерот Ковачевски денес предложи комплициран модел за намалување на акцизата кој не само што не го разбра јавноста туку и не гарантира дека ќе придонесе за намалување на малопродажната цена на горивата“,
смета Славески.
Тој ја критикуваше и мерката за намалување на ДДВ за греењето и основни животни продукти, истакнувајќи дека мерката е задоцнета.
„Што да се каже за мерката намалување на ДДВ за централното греење, електричната енергија и одредени видови основни животни намирници. Ако мерката за намалување на акцизата е премалку, ова намалување на ДДВ сигурно доаѓа предоцна. Покрај ова, некои мерки кои одамна се во сила, беа промовирани како нови, како што е на пример додатокот за енергетска сиромаштија кај примателите на социјална помош и слично“,
рече Славески.
Според него, ДУИ и СДСМ и сега покажувале целосна отсутност од реалноста, „што ја однело Македонија во толку длабока криза“.
Порано денеска премиерот Димитар Ковачевски го презентираше пакетот мерки утврден на владина седница, а кој опфаќа 26 точки и се однесува за ублажување на последиците од кризата како резултат на војната во Украина.