Екипи на јавното претпријатие „Водовод и канализација“ сè уште работат на поправка на дефектот на водоводна цевка во центарот на Скопје, поради што третина од главниот град денеска е без вода. Оптимистички, хаваријата би се поправила дури во подоцнежните часови вечерва, а, најпесимистички, утре изутрина, велат од претпријатието.
„Знаеме дека третина од Скопје остана без вода, ги замолуваме сите граѓани за трпение. Имаме на располагање пет цистерни со техничка вода, па, доколку граѓаните имаат потреба може да се обратат во информативниот центар на бројот 02 3073 010“
вели за „360 степени“ Зоран Стојанов, од ЈП Водовод и канализација.
Хаваријата настанала при планиран зафат
Од претпријатие велат дека санирање на помал дефект веќе бил предвиден за денеска, но неочекувано им се случила хаварија.
„При затворање на затворач Ф 500 се случи хаварија и мораше да го затвориме и главниот довод за град Скопје (Ф 1400) оти се директно поврзани. Се работи на отстранување на дефектот на затворачот Ф 500“. Нашите напори е да се среди дефектот што е можно поскоро“,
вели Стојанов.
Третина од градот Скопје во моментов е без водоснабдување или со намален доток на вода.Според „Водовод и канализација“, дефектот ги засегна жителите на Центар, Аеродром, Кисела Вода, Лисиче, Ново Лисиче, Припор, Сопиште, Ракотинци, Добри Дол, Драчево, Пинтија, Моране и Студеничани.