„Пред 75 години нашите дедовци ја извојувале битката за државност, пред точно 30 години нашите родители на плеќи ја зедоа историската битка за самостојна држава, а ние денес ја преземаме битката за иднината на нашите деца“, порачува носителката на листата, Јана Белчева
Независните кандидати за советници во Општина Центар – Шанса за Центар, на Денот на независноста симболично до канцелариите на Државната изборна коалиција(ДИК) ја поднесе советничката листа за претстојните локални избори.
„Нека ни е честит празникот на сите. Градоначалникот не може ништо да одлучи ако тоа не го одобри Советот. Силен совет значи силна Општина“. Имаме шанса за Центар да ги смениме работите“,
порачаа од советничката листа.
Носителката на листата, Јана Белчева, имаше и видеообраќање во кое порача дека со денешното поднесување на кандидатурата сакаат да ја вратат вербата на граѓаните дека може и мора да се оди напред.
„Кога славиме 30 години од нашата независност со предавање на кандидатурата за советници во Општина Центар, Шанса за Центар сака и симболично да ја врати вербата на граѓаните дека ние може и мора да одиме напред. Напред кон современа, развиена и хумана општина која ќе ја пренесе Македонија во 21 век за што пред 75 години нашите дедовци ја извојувале битката за државност, пред точно 30 години нашите родители на плеќи ја зедоа историската битка за самостојна држава, а ние денес ја преземаме битката за иднината на нашите деца. За следните генерации, за наследството што ќе им го оставиме и просторот кој ќе го чувствуваат, не како простор од кој ќе сакаат да заминат туку како убав и свој простор. Целиот овој досегашен напор кој го вложивме со сета своја стручност и независност сакаме сега да не биде залуден туку да излеземе како победници на овие избори“,
вели Белчева во видеообраќањето.