Лидерот на Алијансата за Албанците, Зијадин Села, во интервју за „360 Степени“, рече дека сите политички партии прават свои анкети, но резултатите не се тие кои се прикажуваат во јавноста, и дека анкетите треба да се регулираат со закон, односно да се забранат, бидејќи наместо да го мерат, тие сакаат да го создаваат јавното мислење.
„Бидејќи говориме за анкети, нашите анкети велат дека ние и сами ја победуваме ДУИ, како Алијанса за Албанците. Од друга страна анкетираните кои велат да за Алијанса за Албанците го велат тоа затоа што тоа го чувствуваат во срцето и даваат искрена поддршка. Додека ДУИ не може да биде сигурна во анкетираните затоа што има и од оние кои велат да од страв и за ова ДУИ е многу свесна. Разликата меѓу Алијанса за Албанците и ДУИ во моментов кога зборуваме не е повеќе од 0.5%, 0.6%. Преведено поинаку, една партија која е на власт и разликата не надминува 1%, сигурен и е поразот и ова го знае ДУИ и сите нејзини претставници и ќе го дознаат уште повеќе кога на 12 април ќе дојде голем број од дијаспората која ќе гласа овде во Северна Македонија и тие знаат дека ќе изгубат. Идејата на коалицирање на Алијанса за Албанците во тристрана коалиција е разликата со ДУИ да биде голема со цел со изборниот резултат утре да има стабилна Влада и да не ни се случи како во 2016 година кога без бројките на ДУИ не се правеше коалицијата, немаше никаква можност без 10 пратеници на ДУИ да има коалиција поинаква од коалицијата ДУИ- ВМРО“,
вели Села.
Во однос на обидите за формирање предизборна коалиција на албанската опозиција, Села вели дека разговорите се во тек и Алијанса за Албанците е за коалиција и со БЕСА и со Алтернатива, како и дека за формирањето на листите и „добитните“ места на нив, планот е да се ангажира анкетна куќа која ќе спроведе анкета, па секој да се држи до позицијата од анкетата.
„Ние сме подготвени, бидејќи сметаме, а тоа го покажуваат сите анкети, нашата предност во однос на двете партии е доста голема. Ние конкурираме на ДУИ, а не на другите политички партии. Ние сме подготвени за оваа коалиција да функционира, ако анкетите покажат две, ние сме подготвени да дадеме три. Ако покажат три, ние да дадеме четири, само да дадеме наш придонес оваа коалиција да функционира. Но ќе кажам и друго, бескрајно е сигурно дека оваа наша понуда нема да ја пропуштат. Верувам за една недела ние ќе ја завршиме за да бидеме коректни и кон јавноста и јасно ќе се знае со кој ќе коалицира Алијансата за Албанците“,
вели Села.
Запрашан за предвидување за бројот на пратеници кои би го освоиле, Села вели дека трипартитната коалиција гарантира најмалку 15 пратеници, доколку одат во коалиција со една од двете партии (БЕСА или Алтернатива) би имале најмалку 13 пратеници, а доколку излезат сами како партија, би победиле во албанскиот блок и би освоиле помеѓу 9 и 10 пратеници, додека ДУИ не би имале повеќе од 7 пратеници.