Панорамско тркало, пиратски брод, подморница, среќна лулашка, интерактивни игри, зони со виртуелна реалност се дел од реквизитите кои, според градоначалникот, ќе бидат дел од новиот луна парк кој ќе се протега на 84 000 квадратни метри
Се расчистува просторот во Градскиот парк, на местото каде што е предвидена изградбата на новиот луна парк, соопшти денеска скопскиот градоначалник Орце Ѓорѓиевски на својот фејсбук-профил.
Тој објави видео на кое се прикажува како се отстрануваат, како што вели, старите бесправно изградени дискотеки, со што локацијата се подготвува за реализација на проектот – изградба на луна паркот во Скопје.
„Ред мора да има! Се расчистува просторот за изградба на луна паркот. Старите бесправно изградени дискотеки во Градскиот парк заминуваат во историјата. Како што ветив, најдоброто за Скопје“,
напиша тој.
На 12 декември минатата година Ѓорѓиевски информира дека почнува јавната набавка за проектирање и монтажа на новиот луна парк во главниот град.
Панорамско тркало, пиратски брод, подморница, среќна лулашка, интерактивни игри, зони со виртуелна реалност се дел од реквизитите кои, според градоначалникот, ќе бидат дел од новиот луна парк кој ќе се протега на 84 000 квадратни метри.
Според градоначалникот, станува збор за ултрамодерен луна парк, кој ќе биде изграден според највисоки европски стандарди и ќе предничи како еден од најдобрите во регионот.
Изградбата на нов луна парк е дел од проектите од неговата изборна програма како кандидат за градоначалник на Скопје.