Родителите го започнаа маршот од „Паркот на револуцијата, а движејќи се во Трговскиот центар, каде се лоцирани повеќе кафулиња во градот, гостите, во најголем број млади, станаа и молчејќи им оддадоа почит на загинатите во пожарот
Родителите на починатите во пожарот во т.н. дискотека „Пулс“ во Кочани денеска го одржаа 28. „Марш на ангелите“, барајќи правдата и вистината за овој случај да излезат на виделина.
Родителите го започнаа маршот од „Паркот на револуцијата, а движејќи се во Трговскиот центар, каде се лоцирани повеќе кафулиња во градот, гостите, во најголем број млади, станаа и молчејќи им оддадоа почит на загинатите во пожарот.
Манта Стојменова, мајка на Спире Стојменов, починат во пожарот имаше 15-минутно обраќање на кружниот тек на улицата „Стево Теодосиевски“, посочувајќи дека им е доста од неказнивост, корупција и од молк.
„Каде се институциите? Каде е системот што требаше да не штити? Каде беа тие што седат во своите луксузни канцеларии и меки фотелји и зимаат плати од народни пари, а не видоа, не слушнаа, не почувствуваа дека пред нив се создава однадвор шупа, а внатре замок на монструм“,
рече таа.
На оградата пред зградата на Основниот суд и Обвинителството во Кочани, родителите оставија фотографии од своите починати деца.
Судскиот процес за пожарот во т.н. кабаре „Пулс“ во Кочани ќе почне на 19 ноември. Информацијата дека е закажано судењето, Кривичен ја соопшти на денот кога се одбележуваа седум месеци од трагедијата која однесе 63 млади животи и во која беа повредени повеќе од 200 лица.
Судењето ќе се одвива во судницата во рамките на Казнено-поправната установа „Идризово“, а првото рочиште на 19 ноември, ќе почне во 9:30 часот.
Почетокот на судењето е закажано откако надлежниот совет при Основниот кривичен суд Скопје на почетокот на октомври во целост го одобри обвинителниот акт што првично го поднесе Основното јавно обвинителство Кочани, а кој потоа со решение на државниот јавниот обвинител, Љупчо Коцевски, беше доделен во надлежност на скопското Основно јавно обвинителство.
Согласно Автоматизираниот систем за распределба на судските предмети – АКМИС, како што претходно информираат од Кривичен, предметот е распределен кај судијката Диана Груевска-Илиевска.