Градоначалникот на Кисела Вода Орце Ѓорѓиевски на Фејсбук информираше дека механизацијата е на терен и оти нема опасност по населението
Поради обилните врнежи од дожд, Маркова Река вечерва се излеа во село Батинци, предизвикувајќи поплави на улиците и во дел од домовите. Надлежните служби се на терен и работат на враќање на реката во нејзиното корито, додека локалните власти уверуваат дека нема опасност за населението.
Градоначалникот на Студеничани Азем Садики, информира дека состојбата се санира и дека во моментов нема потреба од евакуација, но има материјални штети.
„Во Село Батинци, во Маркова Река има надојдено повеќе вода. На неколку места има излевање од речното корито. Ангажиравме две-три машини малку да ја санираме состојбата. Не знаеме дали ќе продолжи уште, засега има прекин на врнење на дождот, а во околните куќи околу Маркова река има влезено вода во дворовите. Мислам дека за населението не е многу ризично за евакуација, засега има материјални штети по дворовите на неколку домаќинства“,
рече тој.
Заменик-директорот на Дирекција за заштита и спасување Кашмир Салиу, додаде дека нема опасност од поплави, и дека се во постојана координација со градоначалникот на Кисела Вода и Студеничани.
Градоначалникот на Кисела Вода Орце Ѓорѓиевски на Фејсбук информираше дека механизацијата е на терен и оти нема опасност по населението.
„Силно се работи на враќање на реката во своето корито. Со колегата градоначалник на Студеничани Азем Садику сме на терен и будно ќе ја следиме ситуацијата да биде под контрола, во текот на целата ноќ. Спремни сме со сите расположливи сили да помогнеме. Во постојана комуникација сме и со колегата Дејан Митевски од Аеродром, така што и тој е подготвен да помогне во случај да тоа е потребно. Временските непогоди не можеме да ги спречиме, но можеме заеднички да делуваме да нема големи последици“,
напиша Ѓорѓиевски.