Според информациите до кои дошла партијата, како што вели Кузеска, за само една минута откако е застанато возилото, началник на МВР, кој според нивните информации не ни бил во земјава, им се јавил на полицајците и им дал наредба братот на градоначалникот да не биде казнет
Од Социјалдемократскиот сојуз (СДСМ) денеска објавија видеоматеријал како доказ дека функционерите на власта прават што сакаат, без никаква одговорност. Оттаму велат дека со ВМРО-ДПМНЕ и Панче Тошковски на чело на Министерството за внатрешни работи (МВР), наместо ред и поредок, царуваат неказнивост и селективност.
Портпаролката на СДСМ, Богданка Кузеска, за најголема лага го оцени ветувањето на Тошковски дека и брат да му е, ќе одговара.
На денешната прес-конференција објави видео снимка за која рече дека е од полициски радар, а на која се гледа како братот на градоначалникот на Општина Гази Баба, Борче Стефковски, вози со преголема брзина, а притоа полицијата иако го регистрирала и сопрела сепак не го казнила.
„На 20 април 2025 година во 18:31 часот на булеварот ‘Александар Македонски‘ во Скопје полицијата со радар регистрира возило кое се движи со брзина далеку од дозволената за тој потег. Возилото е марка ‘мини купер‘ со скопски регистарски таблички управувано од Далибор Стефковски, брат на градоначалникот на Гази Баба, Борче Стефковски. Тој воедно е и сопственик на возилото“,
рече Кузеска.
Посочи дека братот на градоначалникот среде Скопје „лета“ со 88 километри на час, иако дозволената брзина е 50 километри на час.
„Свиркачи од МВР ни доставија видеоснимка од радарот на која јасно се гледа колку вози Стефковски среде Скопје“
кажа таа.
Ова е снимката од радарот:
Според информациите до кои дошла партијата, како што вели Кузеска, за само една минута откако е застанато возилото, началник на МВР, кој според нивните информации не ни бил во земјава, им се јавил на полицајците и им дал наредба братот на градоначалникот да не биде казнет.
„Бидејќи прекршокот веќе бил евидентиран, наредено им е казната да ја запишат на друго лице. Така, казната е издаде на лице со иницијали С.Ј. под налог број 07929. И оваа докуметнација ни ја доставија свиркачите, но нема да ја објавиме, со цел да ги заштитиме“,
рече портпаролката на СДСМ.
Посочи дека СДСМ бара истрага за целиот случај, како и одговорност за сите вмешани полициски службеници.
Смета дека санкции треба да има за сите инволвирани во настанот почнувајќи од Тошковски, па надолу, оти со него на чело на МВР, законот не важи за функционерите на ДПМНЕ.