Видеото од средбата го пренесоа руските медиуми. На почетокот на средбата Путин рекол дека лично ја споделува болката на мајките што ги загубиле своите синови, но набргу потоа почнал да зборува за лажни вести за војната во Украина
Рускиот претседател Владимир Путин денеска ги прими мајките и сопругите на руските војници кои се борат во Украина, првпат од почетокот на руската инвазија. Средбата се случи по многубројни барања на семејствата на руските војници, кои се пожалиле на недостиг на основна опрема и ужасни услови. Во неколку наврати мајките на руските војници упаднаа во канцелариите за мобилизација на руската армија.
Видеото од средбата го пренесоа руските медиуми. На почетокот на средбата Путин рекол дека лично ја споделува болката на мајките кои ги загубиле своите синови, но набргу потоа почнал да зборува за лажни вести за војната во Украина и рекол:
„Интернетот е полн со измама и лаги, не можете да верувате во ништо“.
Путин им рекол на мајките дека телефонски разговарал со војниците на фронтот:
„Разговарав со нив и ме изненадија со нивното расположение, нивниот став. Не очекуваа дека ќе им се јавам. Овие разговори ми даваат причина да ги наречам херои. Тоа е вистината“.
Тој, исто така, тврдел дека целото руско раководство, во кое е вклучен и тој, ја дели болката на мајките.
„Ние разбираме дека ништо не може да го замени изгубениот син, изгубеното дете, а особено не мајките, на кои сите им го должиме животот“,
рекол Путин.
Ќе направиме сè за да не се чувствувате заборавено, сè што е во наша моќ за да имате рамо на кое ќе се потпрете, им порачал Путин, додавајќи дека не жали за одлуката да започне, како што вели, „специјална воена операција во Украина“, а потоа ја опишал војната како клучниот момент во кој Москва конечно застанала против западната хегемонија.
Руските телевизии не ги објавија изјавите на мајките на загинатите војници.