Според Ивановски, градбата на оваа траса изобилува со предизвици, а еден е токму пробивањето и градбата на тунелите
Директорот на Јавното претпријатие „Македонски железници – Инфраструктура“, Синиша Ивановски, денеска на неговиот фејсбук-профил објави видео од пробивање на претпоследниот од вкупно 15 тунели на железничката делница од Бељаковце до Крива Паланка.
Ова, како што вели, е вториот дел од градбата на пругата кон Бугарија.
„Добро е кога на крајот од тунелот ќе се појави светло“,
напиша Ивановски.
Според него, градбата на оваа траса изобилува со предизвици, а еден е токму пробивањето и градбата на тунелите.
Иако, како што вели, прогресот на градбата на целиот проект не е на посакуваното ниво, сепак, би го пофалил изведувачот за успехот во градбата на тунелите.
Очекува и другите сегменти во градбата на железницата да бележат успех.
Вицепремиерот и министер за транспорт на земјава, Александар Николоски, соопшти дека очекува во декември или во јануари следната година да биде објавен тендерот за третата фаза од проектот за железничко поврзување со Бугарија.
Тој, и неговиот бугарски колега Гроздан Караџов на 6 ноември го потпишаa Договорот за подготовка, изградба и оперативност на меѓуграничниот железнички тунел помеѓу Македонија и Бугарија, со што двете земји ги дефинираа активностите и меѓусебните обврски за изградба на меѓуграничниот железнички тунел на Коридорот 8.
Тогаш најави дека за брзо време ќе го покани Караџов во Македонија на завршувањето на пругата од Бељаковце до Крива Паланка, како и на отпочнување на градежните работи на пругата од Крива Паланка до границата.