Во болницата во Суботица се примени две лица со прострелни рани во пределот на градниот кош и во стомакот, на кои дежурните лекари им ја укажале потребната лекарска помош, додека третиот повреден сè уште не стигнал в болница, пренесува РТС
Три лица се ранети во престрелка меѓу две групи мигранти, што се случила денеска околу 14 часот во шума на периферијата на Суботица, потврдија за РТС од Полициската управа во Суботица.
Во болницата во Суботица се примени две лица со прострелни рани во пределот на градниот кош и во стомакот, на кои дежурните лекари им ја укажале потребната лекарска помош, додека третиот повреден сè уште не стигнал в болница, пренесува РТС.
Граѓаните кои живеат во близина на Трешеште, шумска област во близина на српско-унгарската граница, објавија на социјалните мрежи дека се слушаат рафали од огнено оружје кои доаѓаат од шумата.
Од полицијата наведуваат дека на терен се присутни засилени полициски сили.
По повод инцидентот во Суботица, началникот на Северна Бачка, Бојан Шоралов, на Фејсбук објави дека засилените акции на надлежните органи за контрола на мигрантите довеле до голем револт од шверцерски групи и до престрелка.
„Денеска во шумскиот предел помеѓу Радановац и Трешетиште во периодот од 12:45 до 13:30 часот било употребено огнено оружје од нерегуларни мигранти при што се повредени неколку мигранти. Моментално во Општата болница во Суботица се однесени две лица, еден за нега на полесни и еден со тешки повреди“,
напиша Шоралов.
Тој додаде дека во тек е акција од страна на Министерството за внатрешни работи за утврдување на сите факти поврзани со околностите на споменатиот настан и официјалното соопштение во врска со тоа.
„Ќе продолжиме да ги преземаме сите неопходни мерки и активности за да го спречиме престојот и преминувањето на нерегуларните мигранти во граничниот појас на градот Суботица, како и отстранувањето на сите неформални кампови што можеби биле изградени тука“,
пишува Шоралов.
Шоралов додава дека секојдневно ќе се спроведуваат акции за сместување на мигрантите во прифатни центри на територијата на Србија.
Во однос на минатата година, Шоралов пишува дека бројот на мигрантите е драстично помал.
По улиците околу населеното место има полициски и возила на брзата помош, а во околината неколкупати се слушаат истрели.
Според последните информации, ситуацијата сега е под контрола, а акцијата е сè уште во тек.