Стоилковски алудира на изјавата на Ахмети која тој ја даде од митингот на „Европскиот фронт“ во Скопје пред одржувањето на првиот круг од претседателските избори кога рече оти лидерот на ВМРО-ДПМНЕ е израснат со бисквити и гурабии
Еден од портпаролите на ВМРО-ДПМНЕ, Наум Стоилковски, денеска на своите профили на социјалните мрежи објави кусо видео во кое, јадејќи бисквита, упати саркастична порака до лидерот на ДУИ, Али Ахмети.
На видеоснимката, Стоилковски е седнат на едно од предните седишта во автомобил од каде што вели дека оди на состанок со коалициските партнери на ВМРО-ДПМНЕ. Потоа зема бисквита и почнува да ја јаде.
На крајот вели – „Поздрав, Али“ – мислејќи на лидерот на ДУИ, Али Ахмети.
Поздрав, Али
— Naum Stoilkovski (@NaumStoilkovski) May 10, 2024
??❤️???#Македонија pic.twitter.com/IPrUvylUt4
Стоилковски алудира на изјавата на Ахмети која тој ја даде од митингот на „Европскиот фронт“ во Скопје пред одржувањето на првиот круг од претседателските избори.
Првиот интегративец дел од својот говор на тогашниот митинг посвети на претседателот на ВМРО-ДПМНЕ, за кого рече дека бил пораснат со гурабии и бисквити. За себеси, пак, рече дека е пораснат во „кула од камен што трипати била изгорена од освојувачите“. На Мицкоски му порача и да не започнува беља и да ги бира зборовите.
Лидерот на ВМРО-ДПМНЕ, пак, навестувајќи ја можната соработка со коалицијата „Вреди“, тогаш му врати на Ахмети оти за многу брзо „ќе му преседнат и млекото и кексите“, зашто ДУИ ќе оди во опозиција.
По убедливата победа на ВМРО-ДПМНЕ на изборите пред два дена, лидерот Христијан Мицкоски денеска во седиштето на партијата одржа состанок со претседателите на партиите што се дел од коалицијата „Твоја Македонија“, од кои рече дека добил поддршка за отпочнување преговори за состав на идната влада.
Според изјавите на Мицкоски од последните денови, сè поизвесно е дека коалицијата „Вреди“ на опозициските партии на Албанците ќе биде коалициски партнер на ВМРО-ДПМНЕ во идната влада. Формален договор за соработка засега не постои, но Мицкоски вели дека се во неформална комуникација со „Вреди“ за ова прашање.