Можеби во ангажирањето на дополнителните хонорарци нема ништо контроверзно, па во тој случај ќе значи дека Владата направила лоша процена со недавањето на тие информации, вели Поповиќ
Во поларизирано општество не смее да се занемари дека може да се случи и персонален напад кон лица кои се вработени или хонорарно ангажирани од страна на Владата, но за нивните права има повеќе институции кои треба да се грижат, вели постариот истражувач во Институтот за демократија, Миша Поповиќ, во вечерашната дебата на „360 степени“.
Темата со ангажманот на дополнителните 58 хонорарци во Владата и првичната одлука да не ѝ бидат дадени нивните имиња на увид на јавноста, предизвикаа реакции и негодувања особено на социјалните мрежи. Портпаролот на Владата, Душко Арсовски, како аргумент за првичната одлука да не се соопштат имињата јавно вели дека е и тоа што во поларизирано општество како нашето често таквите лица се на мета или јавен линч.
Поповиќ вели дека тоа е недозволиво да се случува, но од друга страна не треба да резултира со класифицирање на информации од страна на Владата.
„Се случува тоа и секако дека е недозволиво, меѓутоа, одговорот на тоа не смее да биде затворање односно класифицирање на информации. Постојат други институции што ги штитат правата на овие лица од злоупотреби од таков тип. Не треба да се занемари дека во едно поларизирано општество ќе се случи персонален напад, но тука постојат Министерството за внатрешни работи, Народниот правобранител, Министерството за труд и социјална политика, Комисијата за заштита од дискриминација и други институции кои треба да си ја сработат работата доколку такво нешто се случи. Од друга страна, не гледам како ќе се постигне позитивен исход ако решение е криење на тоа кој работи за Владата“,
вели Поповиќ.
Тој додава дека со одговорот дека Владата не ги дава на увид на јавноста имињата на ангажираните хонорарци, се отворија многу прашања во јавноста.
„Се отворија многу прашања, но еве откако Владата одлучила да ги направи достапни тие имиња од понеделник, можеби и ќе се појави интересен случај, но можеби и нема да има ништо контроверзно. И доколку нема ништо контроверзно, во тој случај Владата направила многу лоша процена со недавањето на тие информации“,
вели Поповиќ.