Средбата се одржува веднаш по кратката средба меѓу американските претставници и руската делегација, а во услови на обвинувања дека Москва се обидува да ги саботира долгоочекуваните мировни преговори со ненадејно барање за исклучување на други земји од разговорите, јавуваат агенциите
Во Истанбул започна средбата меѓу украинската и руската делегација во обид да се дојде до договор за прекин на огнот во војната во Украина, а воведниот говор го имаше домаќинот на средбата, шефот на турската дипломатија, Хакан Фидан.
Средбата се одржува веднаш по кратката средба меѓу американските претставници и руската делегација, а во услови на обвинувања дека Москва се обидува да ги саботира долгоочекуваните мировни преговори со ненадејно барање за исклучување на други земји од разговорите, јавуваат агенциите.
На отворањето на преговорите министерот Фидан, обраќајќи се пред делегациите на Русија и Украина, но и пред турските медијатори, испрати јасна порака:
„Мора да ја искористиме оваа можност за да напредуваме по патот кон мирот“.
Фидан нагласи дека е клучно што поскоро да се постигне прекин на огнот.
Немаше ракување меѓу руската и украинската делегација, а очекувањата за состанокот се мали, со мал напредок што се очекува. Сепак, ова е чекор напред, кој барем има симболична вредност.
⚡️ Talks between the Ukrainian delegation and the Russians have begun in Turkey pic.twitter.com/q2Mq975CMA
— Ukrainska Pravda in English (@pravda_eng) May 16, 2025
Украина изјави пред состанокот дека нејзин приоритет е да се постигне траен, безусловен прекин на огнот и дека е подготвена за мир.
Турција денес посредуваше и во одделни разговори меѓу украинските и американските претставници. Средбите се одржуваат во палатата Долмабахче на Босфорот.
Двете страни се под притисок од американскиот претседател Доналд Трамп да го прекинат најсмртоносниот конфликт во Европа по Втората светска војна. Трамп вчера изјави дека нема да има напредок кон мир без средба меѓу него и рускиот лидер Владимир Путин, кој одби да дојде во Истанбул.