Пласница викендов доби нов градоначалник. По две децении власт на Исмаил Јаоски, на негово место доаѓа брат му, Алија Јаоски. Вториот кандидат, Рамазан Шерифоски, воопшто не се појави пред медиумите. За некои гласачи повеќе и нема потреба од локални избори во Пласница.
Пласница е општина со четири населени места, 4 954 гласачи и осум избирачки места. Од нив, шест избирачки места се во основното училиште „Мустафа Кемал Ататурк“.
Уште на влезот се беше по протоколите и препораките за гласање во услови на ковид-19 епидемија. Па, гласачите беа задоволни.
„Дали Гласавте?
-Да.
Како помина?
-Многу убаво, супер“.
„Да, гласавме. Гласањето се одвиваше во најдобар ред. Се почитуват сите мерки во врска со пандемијата, пред се протоколите се почитуват поради наша заштита и на останатите граѓани“.
„Да, гласавме, го дадовме својот глас. Многу добро течеше гласањето. Се почитува, се беше мирно. Се беше ок народот си е кај нас добар“.
ни рекоа жителите кои ги анкетиравме.
Пласница е мала општина, но очекувањата на граѓаните за тоа што би им донеле изборите не се мали, бидејќи такви се и проблемите.
„Повеќе водата кај нас е црна точка. Има доволно, меѓутоа ќе се соберат изворите. Така веќе имаат за Преглово, веќе е готово пред крај и сега за Пласница.“
„Од новиот градоначалник очекуваме да ни се подобри инфраструктура во нашите населени места во нашата општина, бидејќи се четири населени места.“
„Очекуваме да има вработување, мислиме дека многу добар градоначалник ќе биде.“
Жителите на Пласница имаа избор меѓу две имиња на гласачкото ливче. Рамазан Шерифоски беше кандидатот на партијата Движењето за национално единство на Турците (ДНЕТ). Другиот кандидат беше на ДУИ. Алија Јаоски, братот на Исмаил Јаоски, кој две децении беше градоначалник на Пласница.
Исмаил, кој сега е пратеник во Собранието од листата на ДУИ, се појави пред штабот на Алија, половина час пред затворањето на гласачките места. Правото на глас го чувал до последен момент.
Пратеникот Јаоски ги почитуваше здравствените протоколи, но кога влезе на гласачкото место побара да гласа јавно, на што доби учтиво објаснување дека не може.
Откако гласаше зад параванот, Јаоски, сепак, покажа за кого гласал.
Дали ја прекршил тајноста на гласањето, што се казнува со затвор од најмалку три години, ќе одлучи обвинителството. Она што е сигурно е дека неговиот глас не влијаеше на конечниот исход.
Од 4 954 гласачи, во Пласница вчера гласаа 1 974 или безмалку 40%. Од тие што гласале, околу 86% го поддржале Јаоски, речиси 12% Шерифовски, а 2% ставиле неважечко ливче во кутијата.
Брзо почнаа и честитки.
Министерот за економија од редовите на ДУИ, Крешник Бектеши, беше задолжен да го објави победникот.
„Жителите на оваа многу важна општина го кажаа својот глас, каде доверба од над 85% му дадоа на кандидатот на ДУИ, господин Алија Јаоски“,
рече Бектеши.
Алија Јаоски не го наследува брата си првпат. Според податоците од Централниот регистар, новиот градоначалник на Пласница е газда на фирмата „Пуцко комерц компани“, која вработува 24 лица и лани имала обрт од околу 750 000 евра. До 2008 година газда на таа фирма бил Исмаил Јаоски.
Сепак, семејството е познато по друга компанија, „Пуцко петрол“. Ниту стариот ниту новиот градоначалник формално не се дел од сопствеништвото, но до 2014 година таму се појавуваше името на Исмаил Јахоски. Сега газда на фирмата која има годишен обрт од 46 милиони евра е Асмир Јахоски, син на пратеникот Исмаил и внук на новиот градоначалникот Алија Јаоски.
Тој, пак, покрај семејните бизниси сега ќе мора да работи на проблемите на граѓаните.
„Видете, во делот на водата ние во моментот имаме кој се реализира пројект во планините. Некаде 80% е реализиран. Во рок од 3 месеци, тие извори навистина имаат голем капацитет од 24 литра во секунда, се надеваме дека тој проблем ќе се реши за навек“,
вели Јаоски.
Но, за решавање на проблемот со вработувањето и задржувањето на младите во општината, Јаоски смета на локалната власт и треба помош од државата.
„Ние сме мала општина, рурална општина, општина која живее од земјоделие и од сточарство. Значи, нема начин како да ги задржиме, но јас како приватна фирма и останатите фирми имаме дел задржено од тие млади. Се надеваме дека државата нешто може да помогне со нејзината помош. Да се отвори некој погон што со нејзина помош може да се задржат да останат тие што се останати“,
вели тој.
Вчерашните избори му гарантираат градоначалничка фотелја на Јаоски само до следната есен, бидејќи е избран на вонредно гласање откако брат му стана пратеник. Редовните локални избори се за околу десет месеци. Јаоски вели ќе се кандидира и тогаш, но само ако успее да исполни барем 60-70% од ветените проекти.
Неговите симпатизери очекуваат да продолжи таму каде застанал брат му.
„Од новиот градоначалник очекуваме уште подобро него од стариот градоначалник. Стариот градоначалник се направи во Пласница за овој пола народ овде не чини. Тој што придонесе во Скопје, нема придонесено никој. Алија не ми е ни брат ни побратим ни Исмаил не зборувам од фамилија, луѓето се вредни придонесуват и за Македонци и за Албанци и за Роми без разлика на вера и нација.“
„360 степени“ се обиде да го добие и противкандидатот на Јаоски, Шерифоски. Но, тој не сакаше јавно да го коментира резултатот и разликата во гласовите. Таков коментар добивме од еден жител на Пласница.
„Имаме доверба и во претходниот и во него си имаме голема доверба и молим те значи наредни избори не сакаме да имаме, си имаме засекогаш веќе градоначалник, не сакаме повеќе избори.“
