Во таа насока, оттаму потсетуваат на законските одредби во кои е санкционирана употребата на пиротехнички средства, прекршочни глоби кои предвидуваат и затворски казни за лицата кај кои ќе бидат пронајдени експлозивни материи
Претходно, од МВР информираа дека вчеравечер во Штип биле пронајдени 4 300 парчиња пиротехнички средства, за што е лишено од слобода едно лице
Петардите не се играчка, нивното користење е строго забрането бидејќи може да биде исклучително опасно по животот и здравјето на луѓето, особено на младите, и да остави трајни последици.
Ова е дел од апелот што Министерството за внатрешни работи (МВР) денеска го упати до граѓаните, во кој ги повикува да се воздржат од употреба на пиротехнички средства за време на Новогодишните празници.
Од Министерството велат дека преземаат континуирани активности со засилена динамика пред Нова година, кога употребата на пиротехнички средства е најприсутна, а со цел зголемување на свеста кај младите, но и кај нивните родители за штетите и последиците што можат да ги предизвикаат овие средства.
„МВР презема и акциски контроли, со цел санкционирање на употребата на петарди и други пиротехнички средства и ги потсетува граѓаните за законските одредби во кои е санкционирана употребата на пиротехнички средства и нивната нелегална продажба“,
велат од МВР.
Во таа насока, оттаму потсетуваат на законските одредби во кои е санкционирана употребата на пиротехнички средства. Посочуваат на Законот за прекршоци против јавниот ред и мир кој во член 31 предвидува глоба за оној што неовластено употребува пиротехнички средства.
Од МВР потсетуваат и на членот 396 од Кривичниот законик каде е санкционирано недозволеното изработување, држење и тргување со оружје или распрскувачки материи, а во кој се вели дека:
„(1) Тој којшто неовластено изработува, држи, продава, набавува или врши размена со огнено оружје, муниција или експлозивни материи, ќе се казни со затвор од три до десет години;
(2) Ако предмет на делото од ставот 1 е поголемо количество на огнено оружје, муниција или експлозивни материи, или огнено оружје, муниција или експлозивни материи кои на граѓаните им се забранети, сторителот ќе се казни со најмалку пет години затвор“,
велат од МВР.
Министерството упатува апел и до родителите на да не им купуваат пиротехнички средства на своите деца, токму поради трагичните последици што можат да ги предизвикаат врз нивното здравје и животот.
„Апелираме до граѓаните да ги почитуваат законските прописи и да соработуваат со полицијата и сите нарушувања на јавниот ред и мир да ги пријават во полициска станица или преку телефонските броеви 192 или 112“,
порачуваат од Министерството.
Претходно, оттаму информираа дека вчеравечер во Штип биле пронајдени 4 300 парчиња пиротехнички средства, за што е лишено од слобода едно лице.
Според МВР, полициски службеници од Секторот за внатрешни работи (СВР) Штип вчера во 20:15 часот го лишиле од слобода М. Н. (47), жител на градот, откако при преглед на неговата тезга на градскиот плоштад „Слобода“ пронашле и одзеле 1 340 парчиња разновидна пиротехника. Подоцна, со судска наредба, бил извршен и претрес во неговиот дом, при што биле пронајдени уште 2 993 парчиња пиротехнички средства.
„Лицето е задржано во полициска станица и за настанот е известен јавен обвинител. По целосно документирање на случајот, против него ќе биде поднесена соодветна кривична пријава по член 396 од Кривичниот законик“,
велат од Министерството за внатрешни работи.