Тоа е сумата на најевтините поднесени понуди во секоја од четирите категории, односно делови од униформата. Сумата би можела да се намали преку електронската аукција која следува, но и да се зголеми – доколку некои од понудите се отфрлат како непотполни
Пролетоска, беше потпишана рамковна спогодба за набавка на униформа за специјалната полиција. Тој тендер го добија тазе формирана фирма со сопствеништво од Србија и мало женско модно студио од Битола. Нарачани се, но досега не стигнале првите нови униформи за специјалците
На средината на септември министерот за внатрешни работи Панче Тошковски најави нови униформи за редовната полиција. И како дизајн, и како нова стока што треба да се купи на тендер.
„Ќе треба да се набават полициски униформи за над 7 000 лица. Зошто? Заради тоа што сакаме да ги ребрендираме, ова, е таа е за овие што ги гледате овде, сакаме полициските службеници да носат достојна, нормална, квалитетна и нова униформа“,
рече своевремено Тошковски.
Една недела подоцна, на 22 септември, Министерството за внатрешни работи го распиша тендерот и ги повика сите заинтересирани да земат учество. Два месеца подоцна, на 19 ноември, на четвртиот кат во зградата број 5 во комплексот на Министерството за внатрешни работи во Скопје, се одржа отворањето на понудите. Процесот, кој не е дозволено да се снима, покрај ,,360 степени” го следеа и претставници на три компании кои конкурираа.
Набавката е делива, на четири посебни категории:
- Виндјакна со влошка
- Теренска униформа
- Чевли
- Чизми
За виндјакните, заинтересираните понудувачи мораше да исполнат услов да имаат најмалку 50 вработени во производство. За теренската униформа, оваа бројка е поставена на 100 вработени. А, и за нив и за другите..
„Дополнително, во последните пет години понудувачите мора да имаат реализирано најмалку една испорака на стоки од ист или сличен вид, со потврда за извршување. Покрај техничките барања, понудувачите треба да обезбедат гаранција за квалитетно извршување на договорот во висина од 5 отсто и изјава за сериозност на понудата“,
се вели во техничката спецификација.
Тоа, меѓу другото, значи дека критериумите за фирмите што сакаа да понудат чевли или чизми се пониски. Од нив, како и за другите, се бара еден претходен договор, и низа општи услови – да немаат долг кон УЈП, да немаат сторено кривично дело и да не се во фаза на стечај.
На тендерот се пријавија пет фирми. Четири скопски и една од Охрид.
„Нени компани“, „Мегаспорт“, „Микеи интернационал“,„Лејерс ВФ“ – Охрид и „Камекс“.Од нив, само „Нени компани“ и „Мегаспорт“ доставија понуди за сите четири категории. „Микеи интернационал“ конкурираа само во две категории, „Лејерс ВФ“ даде понуда само за виндјакни, додека „Камекс“ се пријави само во делот за чизмите. Според првично понудените цени, „Нени компани“ даде најниска вкупна цена за виндјакни, околу 1,29 милиони евра, и за чизми, приближно 1,7 милиони. „Микеи интернационал“ имаа најниска цена за теренска униформа, околу 3,6 милиони евра, а „Мегаспорт“ за чевли – грубо 1,12 милиони. Ова не мора да значи ништо зашто допрва ќе се оди на електронска аукција, каде се очекува цената да падне.
А кои се компаниите кои конкурираа на повикот? Според податоците од Централниот регистар, дел од фирмите веќе имаат историјат со добивање тендери од МВР, дел пак се релативно нови на пазарот.
Минатата 2024 година, „Нени компани“ имала приходи од околу 3 милиони евра. Во годишната сметка пријавиле просечен број од 34 вработени. Имаат искуство со државни набавки, меѓу нив тендери за униформи за Царинската управа, како и тендер за кошули за потребите на МВР во 2021 година.
„Микеи интернационал“ лани имала приходи во висина од 3,8 милиони евра и просечен број на вработени – 47. Кога се во прашање униформи за МВР, тие во 2020 година го добиле тендерот за изработка на облека за специјалните единици, во вредност од нешто повеќе од еден милион евра.
Искуство со МВР има и „Мегаспорт“ кои во минатото испорачувале чизми за полицијата и специјалните единици. Тие во 2024 година пријавиле приход од 3,1 милиони евра, а просечниот број на вработени изнесува 88.
„Камекс“, која се пријави само за делот за чизмите, каде патем не се бараа строги услови, е мала фирма која лани имала приходи од околу 50 000 евра и просечно само двајца вработени.
За „Лејерс ВФ“ од Охрид нема јавно достапни податоци за работењето бидејќи се регистрирана во земјава на 31 декември минатата година.
Оваа набавка, која по сегашните најниски цени ќе чини околу 8 милиони евра, се случува околу седум месеци по склучувањето на рамковните спогодби за набавка на униформи за специјалните единици на МВР. Нивната вкупна потенцијална вредност беше 3,8 милиони евра, а го добија две фирми, секоја за дел од набавката.
Таа постапка доби внимание во јавноста по написите на „360 степени“- дека поради недостатокот на посебни услови, јавната набавка ја добија фирми без докажано портфолио и искуство. Едниот добитник беше „Ле бранд дизајн“, мало женско модно студио од Битола со 20-ина илјади годишен приход и просечно двајца вработени во 2024-та.
Другиот добитник, „Памитекс“, е фирма која е регистрирана во земјава само три недели пред распишувањето на тендерот, а чии газди водат до фирмата „Теам традерс компани“ Белград, Србија.
„По вашите јавни информации и сомнежи ги повикав овде сопствениците на двете фирми и им кажав дека согласно она кое јас го имам како информација, овде нема незаконитости во постапувањето на МВР. Не може да се утврдат, јас не можам да ги видам, но доколку се утврди било каква незаконитост во делот на нивното постапување, јас ќе бидам најмногу фокусиран да ја најдам таа“,
рече Тошковски.
Дополнителни сомнежи отвори фактот што, според планот за јавни набавки, постапката за тендерот за униформите за специјалците требало да почне во септември. А, тендерот се распиша во декември. Ако тендерот се распишел во септември, октомври, па и првата половина на ноември, на него нема да можел да учествува подоцнежниот добитник „Памитекс“, бидејќи не постоеле.
„Јас сум министер за внатрешни работи, во рамки на Влада сме обезбедиле средства за униформи, сме утврдиле потреба за првата набавка сме набавиле постапка, сме ги поканиле сите и вие ме прашувате како некој отворил фирма три месеци пред тоа. Еве три дена нека е, според тоа што го имам токму таа српска фирма доставувала претходно преку трети лица униформи во истово министерство. Истата компанија“,
кажа Тошковски.
Па, прашавме во МВР, дали започнала реализација на рамковната спогодба со „Памитекс“ и „Ле бранд дизајн“, односно дали полицијата нарачала униформи од нив и во колкави количини. Ни одговорија дека досега се склучени седум договори – нарачки, и тоа четири со „Памитекс“ и три со „Ле бранд дизајн“.
„Од правното лице „Памитекс“, за интервентната полиција е нарачано над 8 500 парчиња опрема во вредност од околу 458 000 евра, за САЕ „Тигар“ по 3 400 парчиња во вредност од 184 000 евра, за Единицата за обука и поддршка 3 800 парчиња униформа во вредност од околу 246 илјади евра, а за Единицата за брзо распоредување 349 тактички јакни во вредност од 32 000 евра“,
Ни одговорија оттаму.
Сумирано, „Памитекс“ добила нарачки во вредност од 921 илјада евра, додека пак трите нарачки за „Ле бранд дизајн“ вклучуваат:
„За Единицата за обука и поддршка се нарачани мултикам комплети во вредност од 195 илјади евра, за САЕ Тигар, мултикам униформи во вредност од 194 илјади евра, а за ЕБР, над 6 800 парчиња од повеќе ставки во вредност од 342 илјади евра“,
изјавија од Министерството.
Или вкупно 732 000 евра.
Но, освен за цените и количините, од МВР побаравме и да ги видиме униформите или да добиеме фотографија од етикетите – каде и кој ги произвел. На ова наше барање, одговорот е:
„Обележувањето односно етикетите на униформите се согласно техничка понуда поднесена во постапка за набавка на Униформа за специјална полиција и тоа на Униформата од „Памитекс“ се „Памитекс“ на Униформата од „Ле бранд дизајн“ се од „Ле бранд дизајн“. Фотографии и увид во униформите во овој момент не сме во можност да обезбедиме бидејќи за горенаведените нарачки течат рокови за испорака“,
велат од МВР.
Горе-долу истите прашања кои ги поставивме до МВР, ги упативме и до фирмите „Ле бранд дизајн“ и „Памитекс“. Се уште чекаме на одговорот.
А, секако ќе мора да се почека на одлуката – кој и за колку пари, ќе ги облекува редовните полициски единици.