Смета дека сега државата повторно е пред закана, но не од оружје, туку од корупцијата, неправдата, дискриминацијата и сиромаштијата
Државата не е ничија сопственост. Не е сопственост на партиите, ниту на владата. Државата е на граѓаните. Таа е нашиот дом. За нашиот дом мора да се бориме сите, порача по повод 8 Септември – Денот на независноста, Венко Филипче, лидерот на опозицискиот Социјалдемократски сојуз (СДСМ).
Во видеообраќањето рече дека пред 34 години граѓаните со храброст и одговорност донеле една од најважните одлуки во историјата на Македонија, одлука да живееме во своја, независна држава.
Таа независност, вели Филипче, не била подарок, туку резултат на визија, мудрост и истрајност.
Смета дека сега државата повторно е пред закана, но не од оружје, туку од корупцијата, неправдата, дискриминацијата и сиромаштијата.
Посочи дека власта ја претвора државата во сопственост на малкумина, а ја оддалечува од граѓаните.
„Сакам да ѝ порачам на власта – ова е земја на сите, за сите. Не само ваша“,
кажа тој.
Според него, патриотизам е да се бориш за чист воздух, а не да се палат депонии, да им се помага на послабите, а не да се трошат државните ресурси за себе.
„Патриотизам е да си го средиме сопствениот двор, сопствениот дом, да се грижиме за заедничкото, оти заедничкото е и ваше и наше, и твое и мое“,
вели лидерот на опозицијата.
Социјалдемократската идеја, рече тој, била и останала двигател на најважните државни одлики и историски моменти.
На крајот од обраќањето, порача дека ако во 1991 година се изборивме за независност, сега треба да се избориме за иднина.
На темата Европска Унија – кажа дека патот кон ЕУ не е само геополитички избор, туку обврска кон граѓаните што сакаат стабилност, правна држава, повисоки стандарди и модерна економија.
„Денес сме на чекор кон Европа. Тој чекор мора да го направиме сами, но заедно и обединето. Верувам дека сите го сакаме истото – сигирна иднина на оваа држава и на нашите деца“,
рече Филипче.