Мемишовски вели дека направил грешка и дека нема да ја повтори
Премиерот Христијан Мицкоски рече дека од МВР побарал жесток одговор за секој што го прекршил законот, се заканувал или го загрозил јавниот ред и мир во текот на блокадите на кои група граѓани протестираа поради правилата на системот „Безбеден град“
Рафет Мемишовски, еден од учесниците на протестите во Битолско поради одземените возила на група граѓани кои возеле без возачка дозвола, вечерва преку видеопорака се извини за заканите кои ги упати претходно неделава. Видеото на Мемишовски кое го пренесува Рома пресс на Фејсбук, е снимено во домашна атмосфера.
Извинувањето тој го адресира до државниот врв, Владата и ресорното министерство. Вели дека направил грешка и дека нема да ја повтори.
„Се извинувам пред цела влада и цело министерство, премиерот, претседателот што направив грешка и што се заканив. Ова нема да се повтори уште еднаш. Бев изнервиран зашто на братучед ми му ја земаа колата, под стрес бевме сите. Се извинуваме. Ова нема да се случи уште еднаш и нема да се повтори. Бевме изнервирани бидејќи на братучед ми му ја земаа колата, правевме штрајкови. Нема да се закануваме повеќе. Повеќе немам што да кажам. Сепак сум благодарен на министерството, на владата се извинувам и ова нема да се повтори повеќе“,
вели Мемишовски во видеопораката.
Мемишовски е лицето кое од протестите и блокадите во Битолско пред неколку дена се закани дека ќе има убиства и тепачки доколку полицијата не им ги врати возилата кои ги управувале без возачки дозволи.
Неговата изјава следува откако премиерот Христијан Мицкоски рече дека од МВР побарал жесток одговор за секој што го прекршил законот, се заканувал или го загрозил јавниот ред и мир во текот на блокадите на патот Битола-Ресен и во Кочанско, каде што група граѓани протестираа поради правилата на системот „Безбеден град“.
Мицкоски денеска повтори дека нема да има компромис за возење без возачка дозвола. Рече дека секој има право на мирен протест и изразување на незадоволството, но ако тој револт ја надминува границата, како во конкретниот случај, државата мора жестоко да реагира.