Злоупотреба на службената должност и проневера на над 2 и пол милиони евра за парцели предвидени за хотелски комплекси им се ставаат на товар на единаесет лица. Меѓу нив има поранешни и сегашни функционери, вработени во Министерството за транспорт и врски, нотари и лица кои биле на високи позиции во Државното Правобранителство. Од Обвинителството за гонење организиран криминал и корупција потврдија дека на продадените државни парцели требало да се градат хотели, а една од нив била наменета за познатите „Шпански скали“.
„Станува збор за отуѓување и склучување договори за отуѓување на земјиште во државна сопственост. Во договорите се предвидени договорни обврски во однос на неисполнување на обврските од страна на изведувачот, но тие обврски не се испочитувани. И покрај тоа што не се испочитувани а бил предвиден реален товар за да се обезбеди државата, како што се прави впрочем во секој договор, таквото нешто е прикриено, реалните товари не се солемнизирани, односно не се прикажани во актите за солемнизација со што е нанесена штета на државата и не се преминало кон еднострано раскинување на договорите, а земјиштето не е вратено во сопственост на државата. “
вели обвинителка Ивана Трајчева.
Таа соопшти дека од десетте лица кои се уапсени, седуммина се веќе сослушани. По едно лице и натаму се трага. За деветмина, Обвинителството побарало мерка притвор, а за едно лице, мерка претпазливост.
„Предложени се мерки по трите основи, но не за сите осомничени. Оние осомничени кои не се веќе на истите работни места, за нив предлогот ми е во поглед на опасност од бегство и влијание на сведоци, додека за оние кои се’ уште работат на истите работни места поради опасност од повторување на делото.“
ја појаснува Трајчева својата одлука.
Трајчева се спротивстави и на реакциите на опозициската ВМРО-ДПМНЕ, од каде сметаат дека не се работи за криминал, туку за различно толкување одредби.
„Не можам да се согласам дека станува збор за толкување на одредби кога имате конкретни договорни обврски потпишани во договоро со конкретни рокови кои треба да се испочитуваат. Во случај кога имате рокови кои се пропишани, тука не можеме да зборуваме за толкување, туку само за почитување на тие рокови и што станува во случај кога тие рокови не се испочитувани. Впрочем, договорот го склучуваат две страни, доброволно се потпишуваат на истите што е израз на добороволна волја и се согласиле на она што е потпишано во самиот договор.“
вели таа.
Иако обвинителката Трајчева одби да говори за имиња, во јавноста се шпекулира дека меѓу осомничените се екс-министерот за транспорт и врски, Миле Јанакиески, членот на раководството на ВМРО-ДПМНЕ и бизнис-партнер на Христијан Мицковски, Димитар Димовски и претседател на ОК на ВМРО-ДПМНЕ, Дејан Митревски. Таа посочи дека од Судот е побарано да го замрзне неосновано стекнатиот имот и парцелите кои се предмет на истрага.