Погледнете го новото издание на емисијата „360 степени”, емитувано на 30 јуни 2025 г. на МРТ 1, во кое гостува министерот за одбрана и потпретседател на ВМРО-ДПМНЕ, Владо Мисајловски
Понудата од италијански „Леонардо“ воопшто не била прв избор на Програмската група и кога се предлага на Управната група да се прифати друг вид хеликоптери по најниска цена, во тој период стигнува, без да се побара од никого, ревидирана понуда од „Леонардо“ којашто во тој момент е пониска… Наеднаш се прифаќа понудата на „Леонардо“, но на потпишување на договорот сумата се зголемува за 37 милиони евра од понудената. Ова, поедноставено, е објаснувањето на министерот за одбрана Владо Мисајловски за постапката за избор на италијанската компанија и потпишувањето на договорот со неа за набавка на осум транспортни хеликоптери за потребите на Армијата поради што договорот е предмет на анализа од странска адвокатска куќа најмена од Владата. Со Мисајловски, кој гостува во новото издание на „360 степени“ на МРТ 1, разговараме и за одлуките од последниот самит на НАТО во Хаг, меѓу кои, и онаа за зголемување на трошоците за одбраната до 2035 г. од сегашните минимум два отсто од БДП на 3,5 отсто со дополнителни 1,5 отсто за инфраструктура. Како земјава ќе стигне до ваков буџет, кои се новите цели на спосоност што ги бара НАТО, дали знае до каде е постапката пред ДКСК за вонредното унапредување на Сашко Лафчиски како основа да биде поставен за началник на ГШ, како Петар Богојески не беше соодветен за директор на Националната агенција за европски образовни програми и мобилност, а е соодветен да едуцира кадар за Армијата и Министерството, се исто така теми во интервјуото со Мисајловски.