Погледнете го новото издание на емисијата „360 степени”, емитувано на 13 ноември 2023 г. на МРТ 1, во кое гостува министерот за надворешни работи и потпретседател на ДУИ, Бујар Османи
Министерот за надворешни работи Бујар Османи, во интервју за новото издание на емисијата „360 степени“ на МРТ 1, вели дека нема никакви индикации дека шефот на американската дипломатија Ентони Блинкен нема да дојде на Министерскиот совет на ОБСЕ кон крајот на месецов во Скопје. Во однос на тоа дали во земјава ќе дојде и рускиот министер за надворешни работи Сергеј Лавров, тој рече дека процедурата за неговото доаѓање е започната, но дека неговото пристигнување е сè уште неизвесно. На тема избори, Бујар Османи, кој е и потпретседател на ДУИ, вели дека во неговата партија преовладува малку ставот „заради логистички, финансиски и административни причини, треба можеби заедно да се оди (на парламентарни и претседателски избори, н.з.), но сè уште нема утврден став бидејќи не заседавале официјално телата на партијата“. Со Османи разговараме и за критичкиот извештај за земјава од Европската комисија, измените во Кривичниот законик, наводите за влијанија врз судските авторитети, албанската опозиција, евентуално враќање на Груевски во земјава…