Властите, како што соопштила националната противпожарна служба на земјата, трагаат по уште едно лице за кое се верува дека е затрупано под урнатините на местото
Најмалку три лица загинале, а седум се повредени откако еден по друг се урнале делови од конструкцијата на автопатски мост во изградба во Јужна Кореја.
Несреќата, како што пренесе „Гардијан“, повикувајќи се новинската агенција Јонхап, се случила денеска во местото Ансеонг, кое се наоѓа на околу 70 километри од Сеул, кога пет армирани бетонски конструкции долги по 50 метри се урнале, откако претходно биле кренати на мостот со кранови.
Медиумите објавија снимка од моментот на уривањето на мостот, што била направена од задната камера на автомобил во движење, кој, како што може да се види, поминува под конструкцијата само неколку секунди пред таа да колабира.
Јужнокорејската национална противпожарна служба соопштила дека во несреќата загинале три лица, а шестмина биле повредени, од кои петмина се во критична состојба. Според други извештаи, пак, во несреќата се повредени седум лица.
Властите, како што соопштила противпожарната служба, трагаат по уште едно лице за кое се верува дека е затрупано под урнатините на местото.
На местото, покрај спасувачките, биле забележани и екипи како ја испитуваат искривената метална арматура и скршените бетонски плочи под столбовите на мостот од автопатот во изградба.
Вршителот на должноста претседател на Јужна Кореја, Чои Санг-мок, повика на мобилизација на целиот расположлив персонал и ресурси за да се спасат сите лица кои се водат како исчезнати и да се осигури јавната безбедност.
Од Министерството за транспорт на земјата соопштиле дека испратиле официјални лица на местото на настанот.