Судирот се случил јужно од главниот град на сојузната држава Илиноис откако песочна бура го зафатила автопатот, речиси целосно попречувајќи ја видливоста. Во несреќата учествувале најмалку 72 возила
Најмалку шест лица загинаа, а 37 се повредени во голем верижен судир предизвикан од песочна бура во американската сојузна држава Илиноис. Несреќата, како што јави Си-ен-ен, се случила во понеделникот нешто пред 11 часот по средноевропско време, а во неа учествувале најмалку 72 возила.
Судирот се случил јужно од главниот град на Илиноис, Спрингфилд, откако песочна бура го зафатила автопатот.
Најмалку 37 лица се здобиле со повреди кои се движат од полесни до опасни по живот и се пренесени в болница. Нивната возраст се движи од 2 до 80 години.
Еден од шестемина загинати е 88-годишен маж, а официјални лица и натаму работат на идентификување на преостанатите пет лица кои загинаа во големиот судир.
По несреќата, автопатот бил затворен доцна во понеделникот.
Полицијата во Илиноис соопшти дека причината за несреќата се силните ветрови што со себе носат прашина од полињата на фармите од другата страна на автопатот, што целосно ја попречува видливоста.
Метеорологот на Си-ен-ен, Чад Мајерс, рече дека ветровите со брзина од 45 милји на час со себе ја собрале прашината и одеднаш автопатот го направиле речиси невидлив.
Големи верижни судири предизвикани од песочни бури неодамна се случија и во Унгарија и во Србија.