Тој го понуди сиот човечки капацитет на неговата партија да помогне онаму каде што е потребно и ги осуди навредите на негова сметка дека сака политички да профитира од ситуацијата
Состојбата на терен е пресложена и пресериозна, а народот е оставен сам на себе да се спасува кој како може, умее и знае. Имаме целосно, целосно потфрлање на системот кој не функционира.
Вака лидерот на опозициската ВМРО-ДПМНЕ Христијан Мицкоски ја опиша состојбата со пожарите во земјава, на прес-конференцијата на која рече дека нема да суди, ниту да дава квалификации за, како што нагласи, владиниот неморал, туку да испрати апел за целосна мобилизација на се што може да се мобилизира од институции, ресурси и човечки потенцијал за заедничко спротиставување на огнениот пустош.
„Апелирам, човечки молам, владините институции да го прават тоа за што се платени, да му служат на народот. Граѓаните се исплашени и под притисок. Имаат чувство дека се оставени на цедило. Сакам да направам јасна разлика и да потенцирам дека народот, пожарникарите и службите кои се на терен и помагаат, ја имаат мојата помош и поддршка, но она што недостасува е отсуството на институционално раководење со тие сили“,
рече Мицкоски.
Тој го понуди сиот човечки капацитет на неговата партија да помогне онаму каде што е потребно, упати апел за неколку работи:
„Да се формира централно кризно тело, а не ова што го има сега државата. Знам дека од Владата ќе одговорат дека веќе има такво, но тоа е далеку под просечно се справува со кризата. Колку животи и имоти треба да се уништат за да владата стане сериозна и наместо циркузанти кои кршат керамиди со оваа деликатна работа да се зафатат стручни луѓе и тим од професионалци. Мора да се ангажираат најдобрите експерти и да се искористат најдобрите човечки потенцијали… Повикувам во најкус можен рок и Собранието да заседава на посебна собраниска седница каде ќе се разгледува точка со информација за последните случувања со пожарите во Македонија. Мора јавно да се изнесат слабостите за да се најдат решенијата“,
рече Мицкоски.
Тој реагираше и на коментарите дека опозицијата ги политизирала пожарите и се обидува политички да профитира, дека го нарекуваат политички пироман…
„Згрозен сум од нивото на речникот што се користи од директните владини платеници но и тие кои се индиректни владини платеници, циркузанти и изманици кои имаат задача да го одвлечат вниманието на народот од вистинските проблеми… Нема да останам ниту рамнодушен на оние странични монструозни лаги кои доаѓаат од еден ист центар, СДСМ, дека опозицијата распалувала пожари. Останувам згрозен како човек и со чувство на гадење гледам на злобата на власта што е доказ само за тоа колку се неспособни да делуваат и помагаат за сметка на тоа колку се способни да лажат и измислуваат. Ги жалам таквите ликови“,
рече Мицскоски.