Летово и во други тетовски села, како Сетоле и Једоарце, на камери за видонадзор биле забележани слични примери од посети на мечки
Мечка е забележана како се качила на тераса од куќа во тетовското село Отуње каде на маса имало оставено јадење. Како што пишува „Тетово инфо“ домаќините биле во внатрешниот дел од куќата, а вратата од терасата била затворена, па успеале да ја снимаат и фотографираат мечката.
Од објавеното видео може да се види дека мечката е качена на масата и јаде од чинија во која има храна. Кратко потоа, откако ќе ги забележи домаќините, таа бега.
Според објавата на медиумот, летово и во други тетовски села, како Сетоле и Једоарце, на камери за видонадзор биле забележани слични примери од посети на мечки кои во потрага по храна, се движат низ селото, уништуваат сандаци со пчели и слично.
Ова не е прв пример на присуство на мечки во селата во делот на Шар Планина. Минатата година имаше пријавено повеќе напади од мечки, а честопати тие можеа да се забележат и покрај патиштата.
Последен случај беше во јули годинава кога 41-годишна жена од тетовското село Синичане беше нападната од мечка додека се движела по шумски пат во атарот на селото.
Претходно во февруари годинава тинејџер на околу 15 години два часа го следела и гонела мечка во атарот на селото Крапа во општина Македонски Брод. Детето не било директно нападнато, ниту повредено од мечката и успеало да избега, но паднало при бегањето, кога заедно со стадото овци се враќало кон трлото, односно дома кон селото.