Подготвен сум во секој момент да отидам на интерпелација во Собрание, иако ги погледнав наводите и тие обвинувања за мене се апсурдни, меѓутоа опозицијата има право во секој момент да достави интерпелација, вели министерот за правда, Бојан Маричиќ, во вечерашното интервју за „360 степени“.
„Иако, сметам дека после гласањето доверба на Владата ова нема многу смисла, но тоа е право на опозицијата и јас ќе ги искористам максимално времето и можностите во Собранието да ги соочиме аргументите и да претставам што сум направил во овие шест месеци“,
рече Маричиќ.
На прашањето околу тенкото мнозинство во парламентот и потешкотијата да се донесат законите, меѓу кои закони и од ресорот правда, Маричиќ вели дека главен фактор на блокадата е опозицијата.
„Ако поднесува илјадници амандмани на секој или на секој втор закон, ако намерно не ги свикува комисиите таму кадешто претседаваат претставници на опозицијата, ако намерно неприфаќа онлајн-седници само за да ја блокира работата на Собранието, секако дека оди тешко. Ако се поднесуваат пет илјади амандмани за точки, запирки, а не се однесуваат на суштината на текстот, тогаш тоа е злоупотреба на легалните алатки кои ги има опозицијата и е дел од политичка стратегија за блокирање“,
вели Маричиќ и додава дека ова е изигрување на довербата на граѓаните.