Судијката Добрила Кацарска во интервју за „360 Степени“ зборуваше за проблемите во македонското судство и дебатата за потреба од ветинг.
„Не би рекла дека само неколку судии се виновни за состојбата во судството. Можеби е бројот малку поголем. Јас би била среќна да е навистина мал бројот на судии коишто не заслужуваат да ја носат судиската тога, но мојот впечаток е малку поинаков. Мислам дека има поголем број на судии на коишто не им е местото во судството“,
вели Кацарска.
Кацарска вели дека е за ветинг во судството и дека тоа не го смета за притисок врз судството.
Кацарска смета дека за ветинг не е потребна промена на Уставот и дека проверката на имотот на судиите може да започне и со Антикорупциската комисија.
„И не треба да се запре само на имотот којшто е на име на судиите, односно на пример, на имотот што го имам јас, што фигурира на мое име, туку и пошироко во семејството да се проверува, затоа што е јавна тајна дека има судии коишто купуваат имот, на име на сестра, на име на брат, итн. Значи, може да почне таа комисија со таа проверка“,
рече Кацарска.
Таа вели дека треба да се гледа целокупното однесување на еден судија.