СДСМ обвинува дека кандидатот на ВМРО-ДПМНЕ и негов сопартиец нападнале активисти додека на терен од врата на врата ја презентирале својата програма за локалните избори. Во првиот круг, разликата помеѓу кандидати на овие две партии беше само 55 гласа
Кандидатот за градоначалник на Василево од ВМРО-ДПМНЕ, Славе Андонов, и негов сопартиец, Ацо Василевски, тепале активисти на социјалдемократите кои оделе од врата на врата во населено место во оваа општина за да ја презентираат програмата на кандидатот на СДСМ, обвинија од владејачката партија.
Како што изјави Јована Тренчевска од Извршниот одбор на СДСМ, инцидентот се случил денеска околу 11 часот и истиот е пријавен во полициска станица.
„Во еден момент кога бевме во маалото каде што ги вршевме активностите врата до врата влегоа кандидатот за градоначалник на ВМРО-ДПМНЕ, Славе Андонов, и негов сопартиец, Ацо Василевски, кои со првично вербални напади сакаа да не исфрлат од дворот каде што бевме и разговаравме со граѓаните. Во еден момент се случи Ацо Василевски ја нападна физички со тупаници Верче, ја удри по рака во моментот кога сакавме да пријавиме во полиција. Во тој момент Крсте, кој сакаше да ја одбрани од насилството Верче, беше нападнат од Ацо Василевски. Нападот врз жена, насилство врз жена е кривично дело, насилството врз кој било граѓанин е кривично дело и токму затоа го пријавивме овој настан за да престанат насилствата“,
изјави Тренчевска.
Во Василево на 31 октомври ќе се гласа во втор круг, откако ниту еден од двајцата кандидати не освои мнозинство од гласовите во првиот круг на 17 октомври. Разликата во првиот круг помеѓу Славе Андонов од ВМРО-ДПМНЕ и Марјан Јанев од СДСМ беше само 55 гласа. Андонов освои 3 090, а Јанев 3 035.