Ковид-19 покажа дека кога здравјето е под ризик, сè друго е под ризик, вели генералниот директор на СЗО порачувајќи дека во 2022 земјите ќе почне да преговараат за подобар глобален одговор на идни епидемии и пандемии, како и дека државите мора да инвестираат во примарната здравствена заштита
Три новогодишни желби за 2022 посакува генералниот директор на Светската здравствена организација (СЗО), Тедрос Аданом Гебрејесус, во новогодишната честитка што денеска ја објави СЗО. Првата е да се победи пандемијата, а како да се направи тоа, Тедрос, одговорот го дава во обраќањето.
„За да се направи тоа, мора сите земји да соработуваат заедно и го достигнат глобалниот таргет од 70 отсто вакцинирано население во секоја земја до средината на 2022 година. Потребно е владите да продолжат да ги користат здравствените и социјалните мерки, вклучувајќи тестирање, секвенционирање и пријавување на сите варијанти на коронавирусот од страна на сите земји без страв од казнени мерки. И сите ние мора да ја одиграме нашата улога со носење маски и дистанцирање, да избегнуваме собири, да се среќаваме на отворено кога е тоа можно или во добро проветрени простории“,
вели шефот на СЗО.
Како втора желба тој порачува дека потребно е да се создаде посилна глобална рамка која ќе обезбедува глобална здравствена безбедност. Во 2022, вели тој, земјите ќе почне да преговараат за глобален договор за справување со пандемии со кој ќе се засилат управувањето, финансирањето, системите и алатките кои му се потребни на светот за превенција, подготовка и брз одговор на епидемии и пандемии.
Наведувајќи ја третата желба, Тедрос порачува дека сите земји мора да инвестираат во примарната здравствена заштита која е темелот на универзалната здравствена заштита.
„Ковид-19 покажа дека кога здравјето е под ризик, сè друго е под ризик. Затоа СЗО ќе продолжи да го промовира здравјето, да работи светот да остане безбебеден и да им служи на ранливите“,
вели Тедрос.