Јеменската телевизија под контрола на Хутите јави дека во нападите загинале три лица, а 11 други се повредени
Воздухопловните сили на Израел денеска извршија жестоки воздушни напади врз голем број цели низ Јемен. Израелската војска (ИДФ) соопшти дека главните цели биле воената инфраструктура на исламистичките бунтовници Хути, поддржани од Иран.
Погодени се меѓународниот аеродром во главниот град Сана, воената база Ал Даилами што ја дели пистата со аеродромот и електраната во крајбрежниот град Худајда. Јеменската телевизија под контрола на Хутите јави дека во нападите загинале три лица, а 11 други се повредени.
На социјалните мрежи се прошири видео на кое се гледа хаосот кој настанал на аеродромот во Сана.
Panic at Sana’a International Airport after Israeli airstrikes hit Houthi targets there pic.twitter.com/zmnnQx0ec3
— Visegrád 24 (@visegrad24) December 26, 2024
Генералниот директор на Светската здравствена организација (СЗО), Тедрос Аданом Гебрејесус, бил на аеродромот во Сана во моментот на нападот.
„Кога требаше да се качиме на нашиот лет од Сана, аеродромот беше цел на воздушни напади. Еден од членовите на екипажот на нашиот авион беше повреден. Пријавено е дека најмалку две лица загинале на аеродромот. Кулата за контрола на летање, чекалницата за поаѓање – на само неколку метри од местото каде што бевме – и пистата беа оштетени“,
објави Гебрејесус на социјалната мрежа Икс, додавајќи дека тој и неговите колеги се безбедни.
Директорот на СЗО информира дека бил во Јемен за да преговара за ослободување на приведениот персонал на ОН и за да ја процени хуманитарната ситуација во земјата.
Во јуни, ОН потврдија дека Хутите во Јемен привеле и затвориле 13 членови на персоналот на Обединетите нации.
Our mission to negotiate the release of @UN staff detainees and to assess the health and humanitarian situation in #Yemen concluded today. We continue to call for the detainees' immediate release.
— Tedros Adhanom Ghebreyesus (@DrTedros) December 26, 2024
As we were about to board our flight from Sana’a, about two hours ago, the airport… pic.twitter.com/riZayWHkvf
Повеќе од една година, нападите на Хутите ги нарушија трговските патишта, принудувајќи ги компаниите да ги пренасочуваат бродовите на подолги и поскапи патувања што ги зголеми стравувањата од глобалната инфлација.
Израел им наложи на своите дипломатски мисии во Европа да побараат Хутите да бидат прогласени за терористичка организација. Советот за безбедност на ОН ќе се состане в понеделник поради нападот на Хутите врз Израел, изјави вчера израелскиот амбасадор во ОН Дени Данон.
Во саботата израелската војска не успеа да пресретне ракети од Јемен кои паднаа во областа Јафа во Тел Авив, при што беа повредени 14 лица.