Волонтерите ги превезуваат постарите граѓани со брод на безбедно. Огнот зафати и бројни куќи, а локалните жители ги сечат дрвјата за да спречат ширење на пламенот
Пожарникарите до вчера вечер не успеаја да го стават под контрола шумскиот пожар на грчкиот остров Евиа, а итните служби низ целата земја се уште жестоко се борат со повеќе од десет пожари.
Според медиумските извештаи, противпожарната бригада, армијата и доброволците не успеваат да се справат со пожарот што беснее во крајбрежниот град Пефки. Волонтерите ги превезуваат постарите граѓани со брод на безбедно. Огнот зафати и бројни куќи, а локалните жители ги сечат дрвјата за да спречат ширење на пламенот.
Грчката телевизија Скај пренесува дека со часови нема противпожарни авиони, додека густ чад го покрива целиот регион, а југоисточниот ветер го шири огнот кон северниот дел на вториот по големина грчки остров.
Оваа сезона веќе имаше неколку големи пожари на Евиа, кои се протегаа и до седум километри ширина. Огромно мнозинство жители беа евакуирани, но, многумина се пожалија дека се оставени на милост и немилост на судбината, бидејќи гаснењето на пожарот започна дури во неделата.
„Ние сме оставени сами. Крајот е близу“,
изјави за Скај, Јaнис Коцијас, градоначалник на загрозениот град Истија, во северна Евиа.
Повеќето жители веруваат дека биле „напуштени“, бидејќи противпожарните авиони се фокусирани на областите околу Атина. Сепак, претставниците на грчките служби велат дека ова е резултат на ограничени ресурси.
„Не можевме да бидеме насекаде во исто време. Замислете само што ќе се случеше ако пожарите што избувнаа северно од Атина се проширеа во густо населени области“,
коментира еден пожарникар.
Според некои извештаи, ситуацијата северно од Атина во неделата се стабилизирала, а пожарникарските екипи објавиле дека успеале да изгаснат некои помали пожари.
Атина има околу четири милиони жители, додека Евиа околу 220 000 жители, а областа погодена од пожарот е многу густа и непроодна шума.
Ситуацијата е нешто подобра на Пелопонез, каде што огнот гори јужно од градот Мегалополис, а друг пожар избувна во западниот дел на полуостровот и се движи кон внатрешноста.