Од ХЕЦ „Чебрен“, првото производство на струја, доколку сè оди според планот, се очекува по 2028/2029 година, а се очекува да се произведуваат најмалку 333 мегавати
Грчката компанија ППС е единствената што до Министерството за животна средина и просторно планирање испратила прифатлива понуда во постапката за доделување концесија за користење води на Црна Река за изградба на хидроцентрали. Француската ЕДФ, исто така, доставила понуда, но надлежната комисија констатирала дека станува необврзувачка понуда и во неа не е доставена бараната гаранција за учество во постапката.
„Тоа ќе значи дека оваа една понуда Комисијата ќе има 60 дена да ја евалуира и да даде изјава до владата. Сакам да потенцирам дека во текот на целата постапка јавноста ќе биде во континуитет информирана. Согласно тендерската документација изборот на приватен партнер се очекува да се случи до крајот на првата половина на 2023 година, по што би започнала градбата на ХЕЦ ‘Чебрен’“,
рече министерот за животна средина Насер Нуредини по отворањето на понудите откако рокот за доставување истече денеска во 11 часот.
На прес-конференција тој посочи дека посебно внимание во постапката посветиле на добро проектирање на условите, при што имале слух за потребите на понудувачите, нивните забелешки во текот на процесот како и за потребата за продолжување на роковите за легализација на проектот поради ковид-кризата
„Овие хидроцентрали ќе бидат со можност за давање на секундарна регулација или т.н. балансна енергија што има своја вредност во привлекување на инвеститори. Втора работа е што проектот ќе се изведува по принцип на Јавно приватно партнерство, каде АД Електрана на Северна Македонија ќе биде јавниот партнер. Северна Македонија денес се препознава како стабилна земја за инвестирање, за што доказ се и денешните пристигнати понуди. Ако се земе предвид дека инвестициите во енергетиката се исплатливи на подолг рок, инвеститорите се секогаш заинтересирани проектите во енергетиката да ги реализираат во стабилни земји“,
додаде министерот.
Од ХЕЦ „Чебрен“, првото производство на струја, доколку сè оди според планот, се очекува по 2028 или 2029 година, а се очекува да се произведуваат најмалку 333 мегавати.
„Овој ден го сметам за историски ден за нашиот енергетски сектор и воопшто за иднината на државата, имајќи ги предвид случувањата со енергетската криза и последиците од недостигот на електрична енергија на глобално ниво, при што генерално државите се ориентираат кон искористувањето на домашните капацитети. Во текот на целиот процес, ние како Влада бевме максимално посветени овој проект да успее, особено затоа што зад нас имавме 13 неуспешни обиди во текот на 20 години“,
рече Нуредини.