Градоначалникот на Општина Конче од СДСМ, Благој Илиев, и дополнителниот заменик-министер за земјоделство од ВМРО-ДПМНЕ, Цветан Трипуновски, се расправаа среде улица во Конче.
Пред два дена Трипуновски на прес-конференција обвини дека мајката на градоначалникот зела државно земјоделско земјиште под закуп и субвенции во два наврати, а притоа не го платила закупот. По ова функционерот на ВМРО-ДПМНЕ во техничката влада ја посетил Општина Конче каде што се сретнал со градоначалникот кој, пак, му се обратил за обвинувањата изнесени на прес-конференцијата.
„Гласот ќе ти се фати, чекај малку“, му вели Трипуновски во дел од разговорот на градоначалникот Илиев.
„Ако мислиш дека си прав, ајде поведи постапка против мене. Ајде, тужи ме за клевета“, продолжува дополнителниот заменик-министер.
„А бе, јас не те тужам, јас те гледам во очи. Немам потреба да те тужам, бе!“, одговара градоначалникот.
Трипуновски, пак, му возвраќа: „Како бе, со речник ‘бе’, така ли ве учат во Ес-де-ес? Јас сум за тебе министер!“.
„Ти не си за селски полјак, не за министер. Вие сте злобни луѓе“, одговара Илиев во продолжението на расправата.
Видеото од оваа средба со Трипуновски, Илиев го објави вечерва на својата фан-страница на Фејсбук.
„Денес, при неговата посета на Конче, го поканив да ја посети и нашата општина и заеднички да поразговараме за проблемите на земјоделците од општина Конче, за неговите обвинувања кон мојата мајка, но и за неговата улога во земјоделството. Поканата беше одбиена, но се сретнавме на улица. Му поставив само 3 прашања… Наместо бараните одговори добив ароганција, цинизам, потсмев, понижување, дрскост“,
напиша градоначалникот на Конче во неговата објава.
Трипуновски, пак, на споменатата прес-конференција обвинувањата ги изнесе повикувајќи се на извештаи од август 2019.
„Мајката на градоначалникот на Конче, Благој Илиев, Сузанка Илиева која има земено под закуп земјоделско земјиште со вкупна површина од 37.9 ха, земала субвенции во два наврати во вкупна висина од 403.845 денари без притоа да го има платено закупот. За 2017 година закупот е платен 14 месеци откако на истата и се исплатени субвенции, а за 2018 година закупот е платен 3.5 месеци подоцна. Кој ѝ исплатил на Сузанка Илиева, мајка на градоначалникот на Конче субвенции без да ги има подмирено обврските кон МЗШВ!?“,
праша дополнителниот заменик-министер.