fbpx
Свет

(ВИДЕО) Гори високотаницата на „Вјесник“ во Загреб, еден од симболите на градот – нема жртви, но огнот постајно се разгорува

360степени | 18 ноември, 2025 07:52

„За жал, штетата е голема. Мнозински сопственик на зградата е државата, градежните инженери ќе треба да утврдат дали објектот е за рушење или ќе се обнови“, изјави утрово градоначалникот на Загреб, Томислав Томашевиќ

Синоќа околи 23 часот голем пожар избувна во висококатницата на „Вјесник“ на „Славонска авенија“ во Загреб, еден од симболите на главниот град на Хрватска. Поради вертикалното ширење, огнот го зафати покривот на зградата и неколку ката, поради што се ангажирани голем број пожарникари и опрема за справување со огнената стихија, пренесува ХРТ.

Пожарот во висококатницата на „Вјесник“ во Загреб / Фото: Принтскрин

Причината за пожарот, кој е сè уште активен, засега е непозната.

Според хрватските медиуми, нема информации за настрадани лица, а пред зградата утрово пристигна и градоначалникот на Загреб, Томислав Томашевиќ, кој изјави дека и покрај напорите на противпожарната служба, огнот постојано се разгорува на различни катови.

„Се гаси одвнатре и однадвор. Причината (за избувнувањето на пожарот) е непозната. Постојат некои сомневања, но истрагата на самото место ќе го утврди тоа. За жал, штетата е голема. Мнозински сопственик на зградата е државата, градежните инженери ќе треба да утврдат дали објектот е за рушење или ќе се обнови“,

рече Томашевиќ.

Засега, како што додава тој, нема опасност од уривање, а најважно во целата ситуација е што нема жртви.

„Безбедноста на пожарникарите е од најголема важност“,

вели градоначалникот.

Како што пренесува хрватскиот национален радиодифузер, пожарот е сè уште активен и се шири низ отворите на конструкцијата, а поради зголема опасност, пожарникарите се повлечени од внатрешноста на зградата.

Сите противпожарни станици во градот се испразнети и се поплнуваат со резервни сили, дознаваат хрватските медиуми од Јавната противпожарна служба на Загреб.

Вицепремиерот и министер за просторно планирање, градежништво и државен имот, Бранко Бачиќ, исто така, беше на улицата „Савска“ во времето на избувнувањето на пожарот, јавува Нова ТВ. Тој не соопштил повеќе информации од она што веќе е познато, наведувајќи дела сè уште не е познато што го предизвикало пожарот.

Пожарот го гаснат околу 100 пожарникари со 30 возила, а дотокот на гас и електрична енергија се исклучени во целата зграда, соопштија од Дирекцијата за цивилна заштита на Хрватска.

Командантот на загрепските пожарникари, Синиша Џебрих, за Нова ТВ, изјави дека морале да ги повлечат пожарникарите поради остатоци и парчињата стакло што паѓаат од зградата и дека пожарот се гаси само од надворешни позиции околу висококатницата. И тој, како и градоначалникот на Загреб, изјави дека нема опасност од уривање на зградата.

Жители на Загреб кои ноќеска се собраа околу висококатницата обвиткана во пламен, изјавија оти им е жал што гори еден од симболите на главниот град на Хрватска.

„Пожарникарите даваат сѐ од себе, но не верувам дека може да се спаси“,

рече еден од нив, пренесе ХРТ.

©2025 360 степени, Сите права се задржани