Според студијата за намалување на ризикот од поплави, која ја изготви УНДП заедно со Град Скопје и Центарот за управување со кризи, во Вардар не треба да се градат насипи, прегради и други објекти, а галиите за третина ја намалиле проточноста на реката
Градот Скопје денеска почна да ја отстранува првата од трите галии во коритото на реката Вардар, онаа што е поставена во непосредна близина на хотелот „Холидеј ин“.
Демонтажата ќе ја вршат екипите на ЈП „Улици и патишта“ во наредните неколку недели, на трошок на фирмата што досега управуваше со галијата во својство на должник во извршната постапка.
„Станува збор за целосно демонтирање – вадење, прво на движните делови што се наоѓаат внатре, а потоа демонтажа и на самата галија. Со ова, започнуваме со поизразено расчистување со криминалниот и подмолниот проект ‘Скопје 2014’. Овие галии не се само надвор од здравата естетика, тие се и опасност за граѓаните на Скопје, имајќи предвид дека сите анализи што ги направи Градот од една страна, но и според студијата на УНДП, кои зборуваат дека галиите во коритото на реката Вардар претставуваат сериозна опасност од поплави кои може да нанесат сериозна материјална штета и да ги загрозат животите на скопјани“,
изјави градоначалникот на Скопје Петре Шилегов.
Според студијата за намалување на ризикот од поплави, која ја изготви УНДП заедно со Град Скопје и Центарот за управување со кризи, во Вардар не треба да се градат насипи, прегради и други објекти, а галиите за третина ја намалиле проточноста на реката.