Според изјавата на градоначалникот, најверојатно причината е што олуците биле затнати, па за време на невремето водата прелила и натежнала врз плафонот кој бил изработен од гипс-картон
Во текот на викендот таванот од гипс-картон паднал во градинката „Мајски цвет“, клон „Јасмин“, во населбата Тафталиџе 2 во скопската Општина Карпош.
Според информациите што ги соопштија од Општината, таванот паднал во две простории, а во уште една е оштетен.
„Ја утврдуваме причината, Најверојатно се работи за технички проблем. Веројатно олуците не биле исчистени поради што дошло до нивно затнување. Имајќи предвид дека станува збор за скриен покрив, водата прелила преку олукот врз изолацијата која натежнала на плафонот од просторијата кој е изработен од гипс-картон“,
изјави градоначалникот Стевчо Јакимовски по извршениот увид.
При увидот, велат од Општината, истовремено забележани се и некои технички пропусти при градбата на објектот поради што градоначалникот побарал да се проверат проектите, понудата и завршните ситуации.
По проверката, најавуваат, ќе бидат објавени дополнителни информации во врска со случајот.