Според Филипче, изминатата година ВМРО-ДПМНЕ ја има доведено државата во најголема економска несигурност, а граѓаните живеат сè потешко
Филипче изјавата на премиерот Мицкоски дека платите не смеат да растат поради инфлацијата ја нарече економска неукост и додаде оти основната економска логика е дека продуктивноста расте ако платите растат
ФОТО: Центар за комуникации со јавност на СДСМ
Економската политика на владата предводена од ВМРО-ДПМНЕ е најлошата во историјата, смета претседателот на Социјалдемократскиот сојуз на Македонија (СДСМ), Венко Филипче.
Според него, по 15 месеци владеење економската состојба на граѓаните е влошена, додека буџетските средства се трошат за лични интереси.
„Десетици милиони евра се буквално украдени од граѓаните преку непреземање мерки за цените, преку непокачување на платите, преку растот на нееднаквоста и сиромаштијата, што е свесна и намерна политика на оваа власт“,
изјави Филипче на денешната прес-конференција.
Филипче рече дека за разлика од сегашната власт СДСМ имал и понатаму ќе предлага мерки за подобрување на економскиот стандард. Тој нагласи дека партијата нема да отстапи од своите предлози, меѓу кои се раст на платите во сите сектори, зголемување на минималната плата на најмалку 500 евра и намалување на цените преку укинување на ДДВ за основните прехранбени производи.
„За жал, владејачкото мнозинство не ги поддржа. Ќе продолжиме, ќе ги поднесеме уште еднаш и понатаму. И нема да отстапиме во таа битка за достоинствен живот, за подобар стандард на граѓаните“,
рече Филипче.
Според Филипче, изминатата година ВМРО-ДПМНЕ ја има доведено државата во најголема економска несигурност, а граѓаните живеат сè потешко.
„Во периодот од доаѓањето на ВМРО-ДПМНЕ на власт, основните трошоци за живот се зголемиле за околу 4 300 денари, додека минималната плата пораснала за само 1 800 денари. Минималната синдикална кошничка достигна 65 507 денари“,
рече Филипче.
Реалната плата, која ја одразува куповната моќ, според него, во јуни пораснала за само 3,8 отсто, додека пред една година, со мерките на СДСМ, растот изнесувал 11 проценти.
„Првпат по долги години имаме пад на просечната плата во споредба со претходниот месец – тоа беше случај во јуни во однос на мај годинава“,
додаде Филипче.
Филипче изјавата на премиерот Мицкоски дека платите не смеат да растат поради инфлацијата ја нарече економска неукост.
„Продуктивноста расте ако платите растат, тоа е основната економска логика“,
рече Филипче додавајќи дека проблемот не е во работниците, туку во Владата, која ги одржува платите ниски во корист на бизнис-елитите.
Актуелната власт, според Филипче, свесно дозволува инфлацијата да се разгорува, со цел да ги зголеми профитите на блиските фирми, додека граѓаните сè повеќе тонат во сиромаштија.
„Граѓаните плаќаат, олигарсите заработуваат. Македонија се претвора во земја на сиромаштија и неизвесност“,
кажа тој.
Филипче ја критикуваше Владата за справувањето со растот на цените, посочувајќи дека соседните земји, вклучително и Србија, редовно преземаат мерки за контрола на инфлацијата и заштита на животниот стандард на населението.
„Кај нас тоа веќе не е тема – власта нема намера да регулира буквално ништо за да ги заштити граѓаните“,
додаде Филипче.
Филипче, посочувајќи ги последните податоци од Евростат, рече дека македонската просечна плата е само 35 отсто од просекот во ЕУ, додека цените достигнуваат 60 проценти од европскиот просек. Тоа, како што рече, е поразително.