Одговарајќи на новинарско прашање во врска со празникот, Филипче сподели и дека паричката на бадинковата вечера во неговото семејство се паднала кај синот
Го честитам најрадосниот празник во христијанството со традиционалната честика – мир Божји, Христос се роди, рече лидерот на Социјалдемократскиот сојуз на Македонија (СДСМ), Венко Филипче, кој денеска присуствуваше на божиќната литургија во Соборниот храм „Свети Климент Охридски“ во Скопје по повод празникот Рождество Христово – Божиќ.
Филипче рече дека им посакува мирни и весели празници на сите верници кои денеска го празнуваат Божиќ, додавајќи дека тоа е традиционален повод да се собере семејството, најблиските и да се покаже почит и грижа.
„Посакувам денот да помине мирно, а мирот во овие турбулентни времиња ни е и тоа како потребен за да можеме да продолжиме општеството да го градиме, да биде праведно, да биде толерантно, да биде слободно“,
изјави лидерот на СДСМ.
Говорејќи во таа насока, тој кажа дека СДСМ во минатото, кога ја предводеше државата, имплементирала политики кои граѓаните можеле да ги почувствуваат и кои придонеле да живеат подобро, побезбедно и побогато.
Филипче рече дека и младите својата иднина ја гледаат тука во државата.
„Имплементиравме политики коишто доликуваат на развиени општества, општества во кои никој нема да се чувствува помалку вреден, без разлика дали станува збор за етничка, дали станува збор за национална, верска, некаква културна, родова, полова или сексуална ориентација. Посакувам сите заедно да градиме општество во коешто никој нема да биде дискриминиран“,
рече тој.
Одговарајќи на новинарско прашање во врска со празникот, Филипче сподели и дека паричката на бадинковата вечера во неговото семејство се паднала кај синот.