Отворивме проблем со Грција кој беше целосно затворен. Сосем непотребно. И сега ВМРО-ДПМНЕ вели дека ќе го решавало по судски пат. Ние 20 години бевме по судови со пресуди во наша корист и тоа никако не ни помогна. Зарем во истиот циклус ќе се враќаме на непотребни процедури, кажа Филипче
Со ниеден потег Владата не покажа дека планира сериозно да се бави со евроинтеграциите, отвори проблеми кои веќе беа решени, а на виделина излезе и големо лицемерие на ВМРО-ДПМНЕ, бидејќи ги погазиле ветувањата за поништување на Преспанскиот и Договорот за добрососедство со Бугарија, кажа претседателот на СДСМ, Венко Филипче. Во осврт за првите триесет дена од новата влада, Филипче посочи дека државата е вратена десет години назад на меѓународен план.
„Како со временска машина ВМРО-ДПМНЕ реши да ги уназади сите процеси и напредокот во меѓународната политика. Отворивме проблем со Грција кој беше целосно затворен. Сосем непотребно, и сега сега ВМРО-ДПМНЕ вели дека ќе го решавало по судски пат. Ние 20 години бевме по судови со пресуди во наша корист и тоа никако не ни помогна. Зарем во истиот циклус ќе се враќаме на непотребни процедури.? Сме покажале пред светот дека самите сме седнале на маса со наш сосед и сме решиле еден проблем. На тој начин се покажува нашиот капацитет да водиме дипломатија“,
рече Филипче на брифинг со новинарите.
На самитот на НАТО Филипче го искритикува премиерот Мицкоски дека немал ниту една релевантна средба со меѓународните партнери. Според него, засега има само сојузништо со Орбан и нејасна перспектива. ВМРО-ДПМНЕ треба да излезе и јасно да каже каде ја води државата, кој е планот, и во која временска рамка планира тоа да го направи, порача Филипче.
„Тие ветија подобри услови во преговорите и подобра Преговарачка рамка. Ние ова ќе го чекаме и ќе го поддржиме секој напор тоа да се постигне. Но нема да поддржиме блокада на процесот со изговори“,
додаде Филипче.
Според него, ВМРО-ДПМНЕ користи лажен патриотизам и „исправена кичма“, како што рече, само за домашна употреба.
„Премиерот имаше средби со двајца највисоки претставници во Бугарија. За средбите дознавме од бугарските медиуми, потоа тој извести. Не знаеме дали иницирал некакво подобрување на нашата позиција во преговорите. Од тамошните медиуми дознавме дека бугарските претставници кажале оти нема да отстапат од своите позиции. Срамно е како се сквернави уставното име, дури и името Република Македонија – политика на гол популизам“,
рече Филипче.
Филипче се осврна и на ребалансот на буџетот, кој, според него, ја носи државата во екстремно голем јавен долг. Тој рече дека веќе се поднесени амандмани во Собранието.
Во однос на заемот од Унгарија потенцира дека станува збор за нелогичен потег на власта.
„Инсиситираме Владата што побрзо да го даде законот за заемот во Собрание и да се каже потеклото на парите. Дали зад тоа се крие можеби друга тенденција, дали има идеја од компании од Унгарија да се преземат тука медиуим. Зошто, за првпат во историјата, посегнуваме со билатерален договор да позајмуваме пари кога ние имаме ангажмани со Светска банка, со Европска инвестициона, програм со ММФ имаме. Зошто не посегнеме по инструменти кои традиционално ни биле на располагање?“,
посочи Филипче.
Филипче на брифингот зборуваше и за состојбите во партијата, а се осврна и на потребите од реформа во правосудството. Посочи дека згрешиле со носењето на измените на Кривичниот законик и апелираше Владата да донесе нов, односно на јавна расправа да го стави Кривичниот законик кој веќе е изготвен во Министерството за правда.