Покрај државниот врв на Северна Македонија, венци положија и претседателката на Косово, Вјоса Османи, и претседателката на албанскиот парламент Линдита Никола, како и бугарскиот амбасадор во земјава Ангел Ангелов
Од Меѓународниот аеродром „Скопје“ тргна поворката со телата на 45-те загинати во автобуската несреќа во Бугарија. Тие ќе им бидат предадени на нивните семејства кои ќе испратат до вечните почивалишта.
На скопскиот аеродром околу еден час траеше преземањето на телата од двата бугарски воени авиони. Војници од Армијата ги презедоа телата од авионите и ги пренесоа во погребните возила, по што следуваше и церемонија на државен пречек и испраќање на настраданите.
Венци положи целиот државен врв, односно шефот на државата Стево Пендаровски, претседателот на Собранието Талат Џафери, премиерот Зоран Заев, првиот вицепремиер Артан Груби, вицепремиерот Љупчо Николовски, шефот на дипломатијата Бујар Османи, како и други функционери од Владата, странски делегации, претставници на политичките партии.
Последна почит оддадоа и претседателката на Косово Вјоса Османи и претседателката на албанското собрание Линдита Никола.
Венец положи и бугарскиот амбасадор во земјава Ангел Ангелов.
На загинатите почит може да им оддадат и граѓаните на плоштадот „Скендербег“ во Скопје каде уште од утрово беа поставени венци од кабинетите на претседателите на државата и на Собранието, од Владата и од Министерството за надворешни работи (МНР).
Сообраќајната несреќа во која загинаа 45 граѓани, а седум беа повредени се случи на 23 ноември, на автопатот „Струма“ во близина на градот Перник во Бугарија кога автобусот на „Беса транс“ – Скопје се враќал од тура во Истанбул.