Акцијата вчера ја спровеле Единицата за насилен криминал и Специјалната антитерористичка единица „Тигар“ на подрачјето на Чаир, Бит Пазар, Аеродром и Визбегово
Еден дрон со мемориска картичка, повеќе пиштоли и куршуми се запленети во вчерашната голема акција на МВР во Скопје. Приведени се четири лица, а по две се трага.
Како што соопшти МВР, станува збор за лица кои се осомничени за кривични дела убиство и предизвикување општа опасност. Сите се од Скопје, а во вчерашната акција направени се претреси во нивните домови.
Конкретно, претресите во домовите биле на подрачјата на: три во Чаир и по еден во Визбегово, Аеродром и Бит Пазар.
Од МВР објавија и детален список на тоа што било пронајдено и одземено: пиштол и рамка со 14 куршуми; пиштол „Астра“ со калибар 6,35 мм и рамка со 5 куршуми; пиштол „Смит и Весон“ со калибар 9 мм и 2 рамки со 32 куршуми; пиштол „Глок“ со калибар 9 мм и рамка со 17 куршуми; дрон со мемориска картичка и контролор за летање; како и други предмети поврзани со кривични дела.
Акцијата вчера ја спровеле Единицата за насилен криминал при СВР Скопје и Специјалната антитерористичка единица „Тигар“.