Под контрола е ставен пожарот на територијата на Општина Македонски Брод во повеќенаменското подрачје „Јасен“ каде што веќе подолг период гори мешана шума
Центарот за управување со кризи (ЦУК) информира дека денеска до 12 часот на територија на целата држава регистрирани се вкупно девет пожари на отворен простор, од кои два се активни, еден е под контрола, а шест се изгаснати.
Активен е пожарот на територија на Општина Прилеп во атарот на селото Беловодица кај местото викано Ливада и атарот на селото Лењиште, каде што гори букова шума.
Активен е и пожарот во Општина Долнени кај селата Стровија и Долгаец, а зафатена е мешана шума.
Под контрола е ставен пожарот на територијата на Општина Македонски Брод во повеќенаменското подрачје „Јасен“, каде што веќе подолг период гори мешана шума.
Шесте изгаснати пожари се во општините Сопиште, Студеничани, Кичево, Велес, Росоман и Демир Хисар.
Претходно, од Дирекцијата за заштита и спасување (ДЗС) информираа дека пожарот во повеќенаменското подрачје „Јасен“, во кој десетина дена гореше мешана шума, конечно е изгаснат од дождот што утринава го зафати регионот. Сепак, предупредија дека и покрај врнежите, опасност од повторно разгорување сè уште постои.
Од ДЗС објавија видеоматеријали на кои се гледа како сега изгледа изгорениот терен во „Јасен“. На едно од видеата се гледа како дејствува хеликоптер на Министерството за внатрешни работи за да се доизгаснат жешките точки.
Директорот на ДЗС, Стојанче Ангелов, вели дека на одредени места од пожарната линија сè уште може да се забележи чадење. Поради тоа, екипите ќе продолжат со пешадиско дејствување за да се спречи повторно ширење на пожарот.