Тоа се акустични уреди и се во режимот на слободна трговија. Друга можна опција е она за што зборуваат, што е строго забрането и никогаш не се користи. Кога сме веќе кај тоа, можевте и самите да се уверите. Како што кажав на самата веб-страница на „Генесис“, 100 земји имаат LRAD-уреди. Овие уреди се користат во 100 земји, во САД во 550 града, кажа Дачиќ
Министерот за внатрешни работи на Србија, Ивица Дачиќ, на прес-конференција соопшти дека полицијата поседува т.н. акустични уреди кои служат за предупредување на масовни собири кога има голем број луѓе на големо растојание. Такви уреди биле поставени на полициските џипови пред српскиот парламент за време на протестот што се одржа во Белград на 15 март.
Дачиќ ги отфрли обвинувањата дека станува збор за звучен топ кој бил употребен кон толпата. Според него, овие уреди воопшто не биле употребени за време на протестот, а за да ги увери новинарите, по прес-конференцијата ги одведе во дворот на зградата на полицијата за да им го покаже возилото на кое бил поставен уредот.
„Тоа се акустични уреди и се во режимот на слободна трговија. Друга можна опција е она за што зборуваат, што е строго забрането и никогаш не се користи. Кога сме веќе кај тоа, можевте и самите да се уверите. Како што кажав на самата веб-страница на ‘Генесис’, 100 земји имаат LRAD-уреди. Овие уреди се користат во 100 земји, во САД во 550 града“,
рече Дачиќ.
Пред новинарските екипи, припадниците на одредот на новосадската жандармерија, чие возило со апарат LRAD беше фотографирано пред парламентот, ја демонстрираа работата на овие уреди и пуштија порака која, според Дачиќ, била однапред снимена како предупредување до демонстрантите да се разотидат. Но ниту таа порака, како што тврди, не била пуштена за време на протестот.
„Тоа е вселенската технологија за која зборуваме. Нашите луѓе не тренираа за тоа, ниту знаат што да прават со неа. Корисна е за нашите единици кои се занимаваат со јавниот ред, но никогаш не била користена“,
кажа Дачиќ.
Претходно, на прес конференција пратеничката од опозициската Партија на слободата и правдата, Мариника Тепиќ, изјави дека Министерството за внатрешни работи на Србија купило седум уреди LRAD 450Xl, како оружје за психичко и физичко мачење на граѓаните на улица.
Таа покажа документ од кој се гледа дека МВР бара набавка на 16 звучни топови од два типа, седум тип 450 xl и девет тип 100. Тепиќ објави и фотографија од уредите поставени на полициските возила за време на протестот.
Партијата на слободата и правдата поднесе кривична пријава против српскиот претседател Александар Вучиќ и други одговорни лица за, како што е наведено, „спроведување политички терор и брутално кршење на човековите права“.
Српскиот премиер Милош Вучевиќ соопшти дека Владата испратила барање до ФБИ и до Руската служба за безбедност (ФСБ) да истражат дали бил употребен звучен топ за време на протестот на 15 март што се одржа во Белград. Барањето како што кажа, било испратено по разговорот со српскиот претседател Александар Вучиќ и преку Министерството за надворешни работи, поточно преку српските амбасади во Вашингтон и Москва, биле доставени барањата до безбедносните служби.
„Поканивме две од најрелевантните и најпознатите светски безбедносни служби, ова е прашање за експерти, ова е прашање за професионалци и ова мора да се истражи до крај“,
рече Вучевиќ.