Најдолгиот документиран говор во историјата на американскиот Сенат до тој момент го имаше одржано сенаторот Стром Турмонд во 1957 година, кој траеше 24 часа и 18 минути. Тој се обидуваше да го блокира усвојувањето на Законот за граѓански права
Американскиот демократски сенатор Кори Букер вчера го собори рекордот во американскиот Сенат држејќи говор против политиката на претседателот Доналд Трамп, кој траеше повеќе од 25 часа.
Педесет и петгодишниот демократ од Њу Џерси прексиноќа излезе на говорницата во Сенатот и заврши дури по 25 часа и пет минути. Тој веќе го собори претходниот рекорд по 24 часа и 19 минути, што наиде на аплаузи во салата.
Според правилата на Конгресот, сенаторот може да зборува колку што сака, под услов да не го изгуби зборот и да нема посебни ограничувања на дебатата. Сенаторите мора да стојат и можат да прават само минимални паузи за време на нивните забелешки.
Најдолгиот документиран говор во историјата на американскиот Сенат до тој момент го имаше одржано сенаторот Стром Турмонд во 1957 година, кој траеше 24 часа и 18 минути. Тој се обидуваше да го блокира усвојувањето на Законот за граѓански права.
За време на својот говор, Букер вети дека ќе продолжи да зборува сè додека телото му служи, со цел, како што рече, да ја наруши нормалната работа на Сенатот за да предупреди на длабока политичка и социјална криза.
„За само 71 ден, претседателот на Соединетите Држави направи толку голема штета на безбедноста на Американците, на финансиската стабилност, на темелите на нашата демократија. Ова не се нормални времиња во Америка. И не треба така да се третираат во американскиот Сенат“,
рече Букер.
Во својот говор, тој ги осуди плановите за можните намалувања на програмата за Медикејд, имиграцијата, социјалното осигурување и владините реформи кои произлегуваат од соработката меѓу администрацијата на Трамп и Илон Маск.
„Тука сум за луѓето. За оние чие здравје е загрозено, за работничката класа, за основните права. И нема да молчам“,
рече Букер.