„Не се работи за здрава личност која имитира лудак“, рече вештото лице за психијатриска процена на обвинетиот Раде Трајковски-Штекли
Вешто лице на одбраната со психијатриска проценка за обвинетиот Раде Трајковски-Штекли денеска сведочеше на судското рочиште за овој случај, во кој тој е осомничениот за учество во организирана трговија со дрога.
Вештото лице на одбраната, Ѓорѓија Хаџи Ангеловски, на денешното рочиште пред Основниот кривичен суд Скопје го процени Штекли како психотичен.
На почетокот на излагањето рече дека го посетил Штекли во затворот „Скопје“, а разговорот со него траел подолго од вообичаено.
Според него, состојбата на обвинетиот е значително променета во однос на претходното вештачење што го извршил пред седум до десет години, кога на Штекли му била констатирана епилепсија.
„Не е тоа истата личност што сега ја видов во затворот“,
кажа Хаџи Ангеловски додавајќи дека кај обвинетиот се забележуваат психотични состојби со шизофрени карактеристики.
Вештото лице вели и дека Трајковски покажува верување во реинкарнација и тврди дека е воден од учител што го пренесува од тело во тело, односно дека верува во фиктивна личност, што му наредува што да прави и како да постапува.
„Не се работи за здрава личност која имитира лудак“,
рече тој.
Додаде и дека обвинетиот е студен, афективно неангажиран, раздразлив и параноиден, што го докажува тоа дека во домот поставил камери и е убеден дека е следен.
На прашањето на судот дали Трајковски е целосно надвор од себе, вештото лице даде негативен одговор.
Според вештачењето што го достави неговата одбраната, Штекли страда од растројство со шизофрени карактеристики, има халуцинации и параноидни идеи и не е способен да ја следи судската постапка. Спротивно на тоа, Обвинителството изготвило психијатриско вештачење во кое се тврди дека тој евапсихотичен, односно нема ментални проблеми и е способен да учествува во судската расправа.
Откако ќе бидат соопштени двете вештачења, судот ќе одлучи на кое вештачење ќе му даде верба или ќе нареди ново психијатриско вештачење.
Како што најави судијата Илија Трпков, ќе се соочат вештите лица на одбраната и на Обвинителството пред да биде донесена одлука дали ќе се прифати едно од нив или ќе се нареди ново.
Судењето продолжува на 5 септември со сведочење на вештите лица на предлог на Обвинителството.
На претходно рочиште одржано на 7 август, четворица од обвинителите, како Бранислав Зајков, Данчо Масев, Владимир Веселиновски и Димитар Трајков, признаа вина, по што судот донесе решение за раздвојување на кривичната постапка.
Обвинението против групата на Раде Трајковски-Штекли беше поднесено на крајот на мај годинава по истрагата на Основното јавно обвинителство за гонење организиран криминал и корупција (ОЈО ГОКК).
Тој и уште девет лица се товарат за продажба на марихуана и кокаин на територијата на Скопје.
Инаку, Трајковски беше приведен на 19 јануари годинава, а следниот ден му беше одреден и 30-дневен притвор, кој му беше продолжен по поднесувањето на обвинението.
Истрагата против групата на Штекли почна со 15 осомничени, за на крајот да стигне до 17 лица. Актуелната бројка од 10 лица во обвинителниот акт е затоа што во меѓувреме седум од осомничените се спогодија со Обвинителството и добија затворски казни од три до три години и шест месеци зависно од степенот на инволвираност во кривичните дела.
За потсетување, Трајковски изминатите две години пред да биде уапсен преживеа неколку обиди за негова ликвидација.
Во него беше пукано во трговски центар, а беше фрлена и експлозивна направа во дворот на неговиот дом во скопската населба Ќерамидница.