Важиме за држава која е добро поврзана на интернет и, многу важно, имаме добар ИТ-талент. Студенти коишто излегуваат од факултети во Македонија во ИТ-делот – од Штип, Битола, секако, првенствено од Скопје, се најквалитетните во регионот и пошироко и свесни за тоа, компаниите бараат пазар што е нов, различен од другите и кој е компетитивен во овие неколку аспекти, вели Стефан Андоновски
Единаесет месеци од стапувањето на функцијата, министерот за дигитална трансформација Стефан Андоновски тврди дека за 30 проценти пораснал бројот на корисници на владиниот портал за е-услуги. Вели дека бројката се движи до околу 5 300 услуги месечно, а следува фаза на промоција на порталот.
„Во тек е избор на компанија за спроведување кампања за промоција на порталот и на новите услуги. Јас сум свесен дека можеби повеќе отидовме во продукција на услуги, на нови услуги, решавање на заднинските прашања, можеби помалку на рекламирање“,
вели Андоновски, кој е гостин во новото дебатно издание на „360 степени“ на МРТ 1.
Најавената промоција за поттик на граѓаните да користат е-услуги доаѓа откако Собранието пред Нова година ги донесе измените на Законот за електронски документи, според кои документите издадени од државните институции, а стекнати по електронски пат, ќе важат исто како и класичните со печат.
Андоновски додава дека работата на порталот ќе се унапреди со користење вештачка интелигенција, со цел граѓаните што побргу да стигнат до посакуваната услуга.
„Сакам да не мора да кликате скоро ништо на порталот, да биде нешто слично на платформите на познатите пребарувачи ‘Гугл’, ‘Јаху’ итн. Влегувате и пред вас е само пребарувачот. Или пишување на неколку карактери, но исто препознавање на вашиот профил, кој сте, каде живеете, возраст и кои би биле најчестите услуги што вам би ви биле потребни, порталот да ви ги исфрла напред, за да не мора да пребарувате“,
вели Андоновски.
Во однос на инвестиции од областа на дигитализацијата, министерот кажа дека досега разговарал со четири светски гиганти кои се заинтересирани за отворање дата-центри за вештачка интелигенција во Македонија. Се работи за приватни инвестиции, за што компаниите не бараат владина помош.
„Тоа се магацини во коишто се сместуваат сервери, коишто служат за пресметувања на големи податоци. Вештачката интелигенција го бара тоа, еден збор кој го пишувате бара огромни калкулации, а за тоа се потребни огромни сервери… Ние сме пазар којшто е географски близок до Европа, нема долго време на пренесување на податоците, многу добро сме поврзани со мрежата на електричната енергија, но и со оптика. Важиме за држава која е добро поврзана на интернет и многу важно, имаме добар ИТ-талент. Студенти коишто излегуваат од факултети во Македонија во ИТ-делот, од Штип, Битола, секако, првенствено од Скопје, се најквалитетните во регионот и пошироко и свесни за тоа, компаниите бараат пазар којшто е нов, различен од останатите и кој е компетитивен во овие неколку аспекти“,
вели Андоновски.
Министерот потврди дека и дел од размислувањата на Крис Павловски – бизнисмен со македонско потекло и сопственик на компанијата „Рамбл“ – биле за инвестиции и во дата-центар. Со Павловски е разговарано на темата инвестиции во дигитализација, но министерот не е сигурен во која насока ќе се движат вложувањата.