Анкетите покажуваат дека партијата на Орбан, Фидес, во моментов заостанува зад опозициската партија Тиса, предводена од Петер Маѓар, пред изборите закажани за 12 април
Потпретседателот на САД, Џеј-Ди Венс, планира во наредните денови да ја посети Унгарија за да му даде поддршка на премиерот Виктор Орбан кој се соочува со неизвесна изборна трка следниот месец, дознава агенцијата Ројтерс од добро упатени извори, пренесува Бета.
Оваа посета би следувала по февруарскиот престој на државниот секретар Марко Рубио во Будимпешта, што укажува на засилениот ангажман на администрацијата на Доналд Трамп во поддршка на еден од нивните најблиски сојузници во Европа.
Анкетите покажуваат дека партијата на Орбан, Фидес, во моментов заостанува зад опозициската партија Тиса, предводена од Петер Маѓар, пред изборите закажани за 12 април.
Иако плановите на Венс се во тек, изворите предупредуваат дека посетата може да биде одложена доколку високите претставници бидат принудени да останат во Вашингтон поради тековната војна против Иран.
Претседателот Доналд Трамп претходно го нарече Орбан силен и моќен водач, а американската десница често го користи неговиот модел како пример за строга имиграциска политика и христијански конзервативизам.
Рубио за време на својата посета нагласи дека лидерството на Орбан е пресудно за американските интереси, па дури и навести економска помош од САД за Унгарија, под услов актуелниот премиер да биде реизбран.