Постои ризик дека укинувањето на повеќето рестрикции за заштита од ковид-19 може да доведе до појава на нови мутации на вирусот, предупредуваат водечки научници во Велика Британија откако тамошната влада најави дека од 19 јули планира да укине најголем дел од мерките.
Докторот Мајт Тилдесли, член на групата научници кои ја советуваат британската влада за справување со пандемии, предупредува дека повторното отворање ќе значи и ризик што повеќе луѓе да бидат изложени на инфекција од вирусот.
„Се разбира колку повеќе случаи имате, особено кога имате висока стапна на вакцинација, тоа претставува еден вид на поголем предизвик за вирусот и му дава поголем потенцијал тој да мутира во форми против кои вакцините се помалку ефикасни“,
вели д-р Тилдесли во изјава за радио „Тајм“, пренесува „Скај њуз“.
И професорката Хелен Стоукс-Лампард, која е и претседателка на Академија на кралски медицински факултети, искажува загриженост за најавеното укинување на мерките со оглед дека „благодарение“ на делта-сојот има зголемен број на новозаразени, приеми во болници и смртни случаи.
„Сите одат во погрешна насока. Дојдовме толку далеку и тука некаде е крајот на пандемијата. Еден ден таа ќе заврши, иако ковид засекогаш ќе биде со нас. Ние мора да научиме да живееме со него. Тоа значи дека сега треба да се биде претпазлив и да се брза мислејќи дека се е готово“,
вели Стоукс-Лампард.
Поради појавата на позаразната делта-варијанта, Велика Британија минатата недела забележа зголемување на новите случаи за 30,7 отсто во споредба со една недела претходно, додека смртните случаи се зголемиле за 43,1 отсто, а приемите во болниците за 55,9 проценти.